دۆسیە
یه‌كێتی دەیه‌وێت پۆستی پارێزگاری کەرکوک وەکو کورد وەربگرێته‌وه‌
 ئاراسته‌:عه‌بدول نه‌جم

ستران عەبدوڵڵا، ئەندامی سەرکردایەتی و سەرپەرشتیاری مەکتەبی راگەیاندنی یەکێتی  رایگەیاند،"پلینیۆم دەتوانێت دو لەسەر سێی سەرکردایەتی بگۆڕێت نەک کەمبکاتەوە کە پلینیۆم لە بەرنامەدا نیە، هەروەها کۆنگرە دەتوانێت سەرکردایەتی بگۆڕێت و کەمی بکاتەوە لەم قۆناغەشدا کۆنگرەش لە ئارادا نیە".

 

دو فاکتەر وایانکرد یەکێتی لە رێڕەوی خۆی بەجۆرێک لە جۆرەکان لابدات

 ستران عەبدوڵڵا لەبارەی دۆخی ناوخۆی یەکێتی رایگەیاند، "دو فاکتەر وایانکرد یەکێتی لە رێڕەوی خۆی بەجۆرێک لە جۆرەکان لابدات و وایکرد راستکردنەوەی رێڕەو پێویست بێت، دوای نەخۆشکەوتنی جەنابی مامجەلال فۆکسێکی زۆری سەرەکی لەناو یەکێتی لەسەر ئەوەبو کە یەکێتی کۆنگرەیەک بکات و خۆی رێکبخاتەوە و بەشێک لەو ئەزمە سیاسیەی کە لەناویەکێتیدا هەیە و فرە جەمسەری، فرە بیرکردنەوە و فرە بڕیاری سیاسی هەبو بەجۆرێک لە جۆرەکان رێکبخرێتەوە، سه‌رنجی سەرەکیمان لەسەر ئەمەبو بەجۆرێک لە جۆرەکان ئەو ستایلە لە حزبایەتی کە جەنگاوەر کۆنەکانی یەکێتی ئیدارەیان دەدا رەنگە پێویستی بە رێکخستنەوە بێت، حورمەتم بۆ تێکۆشەرە دێرینەکان کە رەفیقی مامجەلال بون، بەڵام بە لێکدانەوەی زۆرینەی خەڵک پێویست بو یەکێتی کۆنگرەیەک بۆ خۆی بکات کە 2019 کردی".

 

سه‌رنجی سەرەکی لەسەر کۆنگرە وایکرد عەیبێکی دیکە لە بیر بکەین

 ئاماژەی بەوەشکرد، "سه‌رنجی سەرەکی لەسەر کۆنگرە وایکرد عەیبێکی دیکە لە بیر بکەین، ئەویش عەیبی دروستکردنی حزبێکی دیکەیە لەناو یەکێتی نیشتیمانی کوردستان، ئەمە لە مێژودا زۆر رویداوە و رەنگە بۆ یەکەمجار بێت لەناو یەکێتیدا روبدات، لە مێژودا رویداوە لەناو دەوڵەتدا دەوڵەتێکی دیکە دروست بکرێت، کە لە یەکێک و لەو شتانەی لە غەفڵەتی ئەوەی کە یەکێتی کۆنگرە بکات و قیادەیەکی نوێ بێتە پێشەوە، من خۆم دەتوانم وا سەیری بابەتەکە بکەم غافڵبوم لەوەی کە ئەم دیاردەیە ببینم لەناو یەکێتیدا کە لەدوای کۆنگرەی چوارەمدا رویدا".

 

بافڵ تاڵەبانی رەنگە ئەو باشتر بە دژە تیرۆر بڵێ ستۆپ

 

ستران عەبدوڵڵا باسی لەوەشکرد، "بابەتێکی دیکە کە لێی غافڵ بوین گەورەبونی رۆڵی دامەزراوەی ئەمنی بو لەناو یەکێتیدا، دامەزراوەی ئەمنی بەمانای دەزگای زانیاری، کە ئەمە دەگەڕێتەوە بۆ دو هۆکار یەکێکیان ئەوەیە ئەو رۆڵە گەورەیەی کە دەزگای زانیاری و دژە تیرۆر لە پاراستنی یەکێتی و کوردستاندا گێڕاویانە، رەنگە چاومانی لەسەر ئەوە لابردرێت کە هێڵێک هەیە دەیەوێت ئەو دەستکەوت و شانازیەی ئەو دامەزراوە گەورە و گرنگە سەرمایەگوزاری تیادا بکات بۆ غەرەزێکی تر، ئەو شتە بو بە کێشەیەک لەناو یەکێتی و پێویستی بە دەستپێشخەریەک هەبو کە رەنگە لای من و لای ئەندامێکی سادە نەبێت بەڵکو لای ئەو کەسانە بێت کە خۆیان دەسەڵاتێکی گرنگیان هەیە لەناو یەکێتی، دەسەڵاتی سیاسی، مەعنەوی، بۆ نمونە بافڵ تاڵەبانی خۆی یەکێکە لە دامەزرێنەرانی دژە تیرۆره‌ رەنگە ئەو باشتر بە دژە تیرۆر بڵێ ستۆپ لەوەی کە من بتوانم، من دەتوانم بە کوردستانی نوێ بڵێم ستۆپ، چونکە هەمو رابردوم لەناو راگەیاندندا بوە".

 ئەوەشی خستەڕو، "بەشێکی زۆری دامەزراوە ئەمنییەکە خۆیان رۆڵی گرنگیان هەبو لە پڕۆسەکەدا و دەبێت بۆیان حساب بکرێت، کە رۆڵێکی گرنگیان گێڕا لە راستکردنەوەی ئەو رێڕەوە ئەمنییە بۆ خزمەتی کورد و کوردستان، بە نەتیجە رێگە دان بەوەی کە جارێکی دیکە یەکێتی بکەوێتەوە دەست دامەزراوە حزبیەکان و کەسانی ئەفەندی و رەوتی حزبی سیاسی کە یەکێتی لە مێژوی خۆیدا پێی ناسراوە".

 

ئەو رەوتە مژدەی زۆر گەورەیدا بە خەڵک بەتایبەت یەکێتیەکان

 

ستران عەبدوڵڵا وتیشی، "ئەو حزبانەی کە وەک یەکێتی کە توشی راوەستان یان زامی وەفاتی سەرکردەکەیان دەبن، یان زامی ئەو ئینشیقاقانە دەبن کە لەنێو حزبەکەدا رویداوە وایکرد زام هەبێت لەناو یەکێتیدا و یەکێتی بەجۆرێک لە جۆرەکان نەخۆش بێت، ئەمەش وایکرد ئەو رەوتە مژدەی زۆر گەورەیدا بە خەڵک بەتایبەت یەکێتیەکان، کە زۆر بە پەرۆش بون و دڵیان برینداربون بەرامبەر بە پاشەکشەی یەکێتی و دڵیان برینداربو بەرامبەر بەوەی کە پارتی خەریکە کوردستان قوت دەدات، بە جارێک لە حوکمڕانی و ستایلی حوکمڕانی و پەیوەندی دەرەوەدا، ئەم زامەی یەکێتیەکان وایکرد کۆمەڵێک شیعارات و شتی پۆپۆلیستی کە ئێمە خۆمان بەرامبەر هێزەکانی دیکە بەرامبەری راوەستاینەوە، نەمانزانی خۆشمان توشی ئەو پەتایە بوین، کە وەعدی گەورە و مژدەی گەورە بدەین، بەڵام لە کرداردا هەر مەبەستت ئەوەبێت کە دەست بەسەر یەکێتیدا بگریت".

 

بەمنزیکانە ئەنجومەنی سەرکردایەتی کۆدەبێتەوە

 

لەبارەی کۆبونەوەی ئەنجومەنی سەرکردایەتی، كه‌ له‌دوای روداوه‌كانی ناوخۆی حزبه‌كه‌ كۆنه‌بوه‌ته‌وه‌، ستران عەبدوڵڵا وتی، "بەمنزیکانە ئەنجومەنی سەرکردایەتی کۆدەبێتەوە و هۆکاری ئەوەی کە کۆنەبوەتەوە ئەوەیە ئەگەر بتەوێت ئەزمەیەک چارەسەربکەیت هەتا ژورەکە بچوک بکەیتەوە گرنگە، بەڵام بێگومان بڕیارەکان هەر دەبێت پەسەند بکرێن، مۆدێلی بڕیاردان مەرج نیە بە تەنیا لە کۆبونەوەی ئەنجومەنی سەرکردایەتیدا بڕیار بدرێت، سەرکردایەتی زۆنەکان کۆبوەوە و پەیامیاندا بە هەڤاڵ بافڵ و مەکتەبی سیاسی کە هەڵسەنگاندن بکەن بۆ ئەدای یەکێتی لە قۆناغی رابردودا، کە هەڵسەنگاندن کرا ئەمە بەشێکە لە بڕیارەکان کە دراون، بڕیاری دیکەش ماون کە دەبێت بدرێن، بۆ مێژو ده‌یڵێم، بافڵ تاڵەبانی دو رۆژ دوای هەڵبژاردن داوایکرد کۆبونەوەی ئەنجومەنی سەرکردایەتی بکرێت، نەک ئێستا جارانیش کە کۆبونەوەی ئەنجومەنی سەرکردایەتی دەکرا دەبو مەکتەبی سیاسی و کارگێڕی مەکتەبی سیاسی کۆببنه‌وه‌ بۆ ئەوەی کە کارنامەی کۆبونەوەی ئەنجومەنی سەرکردایەتی دابنرێت، کە 124 ئەندامە و پێکهاتەیەکی پەرلەمانییە، پێموایە بەمزوانە کۆبونەوەکە دەکرێت".

 

 دوای ئەوەی ئەو کێشانە چارەسەر بون کۆنگرە دەبێتە شتێکی زۆر ئاسایی

لەبارەی بونی بەڵگە لەسەر دەرکردنی سەرکردەکانی یەکێتی، ستران عەبدوڵڵا دەڵێت، "بڕیاری دەرکردن بە هەمو ئەو بەڵگانەی کە هەیە پێویستی بەوەنیە کە بۆ هەمو خەڵکی دیکەی دەرەوەی یەکێتی بسەلمێنیت، لە کۆبونەوەی سەرکردایەتی ئەو بەڵگەنامانە پیشانی هەمو سەرکردایەتی دەدرێت".

 په‌یوه‌ست به‌ کەمکردنەوەی ژمارەی ئەندامانی مەکتەبی سیاسی و سەرکردایەتی یەکێتی، ستران عەبدوڵڵا له‌ دیدارێكی خه‌نداندا وتی، "ئەو قسەیە دیعایەی ئەو کەسانەیە کە دەیانەوێت بڵێن ئەم هەنگاوە سیاسیانە شەرعی نین و رێگری بۆ دروست بکەن، ئەگینا پلینیۆم دەتوانێت دو لەسەر سێی سەرکردایەتی بگۆڕێت نەک کەمبکاتەوە کە پلینیۆم لە بەرنامەدا نیە، هەروەها کۆنگرە دەتوانێت سەرکردایەتی بگۆڕێت و کەمی بکاتەوە لەم قۆناغەشدا کۆنگرە لە ئارادا نیە و کاتەکەی ماویەتی و دوای ئەوەی ئەو کێشانە چارەسەر بون کۆنگرە دەبێتە شتێکی زۆر ئاسایی".

 

دەمانەوێت پۆستی پارێزگاری کەرکوک وەکو کورد وەربگرینەوە

 

پەیوەست بە دانانی پارێزگاری کەرکوک، کە لە ساڵی 2017ەوە لەدەستی کورددا نەماوە، رونیکردەوە، "دەمانەوێت پۆستی پارێزگاری کەرکوک وەکو کورد وەربگرینەوە، کێشەی گەورەی کەرکوک ئەوەیە کە ئیرادەی خەڵکەکەی جیاوازە لە ئیدارە شارەکە، ئیدارەی شارەکە بەدەست پیاوێکی عەرەبی عنسورییەوە کە ئیدارەی شارەکە دەکات بە وەکالەت و دەیان دۆسیەی گەندەڵی لەسەرە، ئەنجومەنەکەشی نەماوە چونکە پێشهاتەکانی کۆی دۆخی عێراق، ئەنجومەنی پارێزگاکان نەهێشتوە، ئێمە دەمانەوێت ئیرادە و ئیدارەی شاری کەرکوک رێکبخرێتەوە".