هەواڵ
بافڵ تاڵه‌بانی بۆ یادی 123 ساڵه‌ی ڕۆژنامه‌گه‌ری كوردی په‌یامێكی پێرۆزبایی بڵاوكرده‌وه
 ئاڕاسته‌:به‌هار ئه‌حمه‌د


بافڵ تاڵه‌بانی هاوسه‌رۆكی یه‌كێتی نیشتمانی كوردستان بۆ یادی 123 ساڵه‌ی ڕۆژنامه‌گه‌ری كوردی په‌یامێكی پێرۆزبایی بڵاوكرده‌وه‌.

ده‌قی په‌یامه‌كه‌ ..

له‌یادی ١٢٣ ساڵەی رۆژنامەگەری کوردیدا گەرمترین پیرۆزبایی لە رۆژنامەنووسان و میدیاکارانی کوردستان دەکەم.

لەم رۆژەدا لەحزووری خاوەن قەڵەمە پڕ گەوھەر و بوێرەکانی وەک میقداد مەدحەت بەدرخان، پیرەمێرد، حسێن حوزنی موکریانی، عەبدولرەحمان زەبیحی و ئیبراھیم ئەحمەد بەڕێزەوە رادەمێنین و یاد و یادەوەرییان دەکەینە سەرمەشقی شکاندنی بەربەستەکانی بەردەم ئازادی و ئازادی رادەربڕین و رەخنەلەخۆگرتن.

رۆژنامەگەری پیشەیەکی باڵایە و ناکرێت چیتر بەناوی یاساوە سنوورەکانی کارکردن بەرتەسکبکرێتەوە و ئازادییەکان زەوت بکرێن و بەناوی بەها نیشتمانییەکانەوە کاری رۆژنامەنووسی سنووردار بکرێت. پێویستە رۆژنامەنووسان ئازا و بوێر بن لە نیشاندانی راستییەکان و گەیاندنی زانیارییەکان. چاودێرێکی وردبن بەسەر دەسەڵاتەکانی یاسادانان، جێبەجێکردن و دادوەرییەوە و رۆڵی کاریگەرتر ببینن لە پێشخستنی پرۆسەی دیموکراسی و رووبەرووبوونەوەی گەندەڵی.

ئێمە بەڕێزەوە پێشوازی لە رەخنەکان دەکەین و بە بایەخەوە لە هەر هەوڵێک دەڕوانین بۆ خستنەڕووی کێشەکان و ئەنجامدانی چاکسازی، بەڵام بەداخەوە هەندێک لە میدیاکان ئەرکی پیشەیی خۆیان لەبیرکردووە و دوور لە هەموو پرەنسیپ و بەهایەک هێرشی ناڕەوا دەکەن و تۆمەت دەبەخشنەوە، کەسایەتییەكان دەکەنە ئامانج و سنووری ئازادییە کەسییەکان دەبەزێنن. ئەو میدیا ئاڕاستەکراوانە رۆڵێکی خراپ دەگێڕن لە دروستکردنی بارگرژی سیاسی و لێکترازانی کۆمەڵایەتی. ئەمەش بەهیچ شێوەیەک لەگەڵ بنەماکانی کاری رۆژنامەگەریدا یەکناگرێتەوە و دوورە لە هەموو پیشەییبوونێک.

دەمەوێت دووپاتی بکەمەوە کە یەکێتیی نیشتمانیی کوردستان هەمیشە پاڵپشت و پشتیوانی رۆژنامەنووسانە و رۆڵێکی گرنگی بینیووە لە فراوانکردنی پانتایی ئازادی رادەربڕین. ئەرکی رۆژنامەنووسانیشە پیشەییانە و بەرپرسیارانە مامەڵە لەگەڵ پرس و رووداوەکان بکەن و کاری رۆژنامەگەری تێکەڵی رقی کەسیی و حیزبی نەکەن و هەڵگری قەڵەمێكی ڕاستگۆ و بوێر بن.

بافڵ تاڵەبانی
هاوسەرۆکی یەکێتیی نیشتمانیی کوردستان
45 جار خوێندراوه‌ته‌وه‌
4/22/2021 10:12:47 AM
زیاتر ...
زۆرترین خوێندراو
  • 24 کاتژمێر
  • هەفتە
  • مانگ