هەواڵ
لاهور شێخ جەنگی بۆ ڕۆژی جیهانیی ڕیشەكێشكردنی تووندوتیژی دژی ژنان په‌یامێكی‌ بڵاوكرده‌وه‌
 ئاڕاسته‌:به‌هار ئه‌حمه‌د




بەبۆنەی ڕۆژی جیهانیی ڕیشەكێشكردنی تووندوتیژی دژی ژنان، لاهور شێخ جەنگی هاوسەرۆكی یەكێتیی نیشتمانیی كوردستان پەیامێكی بڵاوكردەوە ...

 

دەقی پەیامەكە: 


پەیامی لاهور شێخ جەنگی بەبۆنەی ڕۆژی جیهانیی ڕیشەكێشكردنی تووندوتیژی دژی ژنان

با لە ڕۆژی جیهانیی ڕیشەكێشكردنی تووندوتیژی دژی ژنان، هەمووان پشت و پەنای ژنانی كوردستان بین.

مێژوو ئەڵێ دایكانی كوردستان، دایكی شارستەنییەتی مرۆڤایەتین كە دەیان هەزار ساڵ لەمەوبەر، لە دامێنی ئەوان و زنجیرە چیا سەركەشەكانی كوردستاندا، مرۆڤی نوێ و خێزانی نوێ و كۆمەڵگەی نوێیان پەروەردە كردووە و، شۆڕشە یەك لە دوا یەكەكانی ئەم گەلەیان ژیاندووە، پاراستووە و گەشەپێداوە.

دایكانی ئێمە، جیاواز لە ژنان و كچانی تری دنیا، جەرگ سوتاوانی شۆڕشی نیشتمانی و، سوتماكی داگیركاری و شەڕی ناوخۆ و، ئازاردراوانی دەروونی و جەستەیی دەست كولتوری چەوت و كۆن و ناڕەسەنن، بەڵام سروشتی ڕەسەنیان وایكردووە كە هەرگیز نادادی و ستەم و جیاكارییە جێندەرییەكان ڕۆ نەچێتە ناو دڵ و دەروونییان و، هەرگیز كیژی كوردستان، بە پاشكۆییەتی، لاوازی و دەستەمۆكارییە ڕەگەزی و كۆمەڵایەتی و كارگێڕی و سیاسییەكان، ڕازی نەبووە.

یەكێتیی نیشتمانیی كوردستان، پارتێكی جەماوەریی و، هەڵقوڵاوی بیر و توانای هەموو چین و توێژەكانی كوردستانە و، جێی سەرنجە كە كچان و ژنانی ئەم كوردستانە، ڕۆڵی پێشەنگیان هەبووە لە پاراستنی یەكێتیی و سەرخستنی خەباتە ڕەواكەیدا.

پارتە ڕەسەنە سۆشیاڵ دیموكراتەكەی كوردستان، یەكێتییەكەی هەڤاڵ مام جەلال، باوەڕی تەواوی بە پاراستنی كچان و ژنان هەیە لە بەرامبەر هەر جۆرە زوڵم و نادادی و دەستدرێژییەكدا.

یەكێتییەكەتان بە كردەوە، بەها گەردوونییەكانی پاراستووە و، باوەڕی بە ڕاماڵینی هەر بەربەستێك هەیە، كە ڕێ لە یەكسانیی ژن و پیاو بگرێت.

یەكێتییەكەتان بە بڕیار و لە هەڵبژاردن و كۆنگرەكانی ڕابردووشدا بە یاسا، زەمینەی هەموار كردووە بۆ سەركەوتنی كچان و ژنانی شایستە بۆ پێگە باڵا حزبییەكان، پەروەردەكردنیان و، هەمیشەش هەوڵیداوە كە كچان و ژنانی خاوەن توانا و باوەڕ و ئیرادە، لە پێگەی حكومڕانییە باڵاكانی كوردستان و عێراق و دەرەوەی دا، ڕابەرایەتی جڤاتەكەیان بگرنە دەست.

سەرباری هەوڵەكانی یەكێتیی و ڕێكخراوە لۆكاڵی و جیهانییەكان بۆ ڕیشەكێشكردنی تووندوتیژی دژی ژنان، و كردنەوەی دەیان ڕێكخراو و ناوەند و دەزگا بۆ بەرگریكردن لە ژنان، بەڵام ئێمە لە سەرۆكایەتی یەكێتیی نیشتیمانیی كوردستان، بە نیگەرانییەوە لەو ڕوداو و ئامارانە دەڕوانین، كە هەڵكشانی تاوانی دژ بە كەرامەت و پێگە و ماف و ئازادی و ژیانی كچان و ژنانی گەلەكەمان نیشان دەدەن.

ئەم نیگەرانییەی ئێمە، زادەی كۆدەنگییەكە لە ناو ئەنجومەنی سەركردایەتی و ڕێكخستنەكانی یەكێتیی و كۆمەڵانی سەربەرزی كوردستاندا، كە هەمووان پێكەوە، ببینە پارێزەر بۆ كچان و ژنان و ڕێ نەدەین دەست درێژی بكرێتە سەر ژیان و ماف و دەرفەتەكانی بەردەمیان. و هەر جۆرە سەرپێچییەك دژ بە ماف و ئازادییەكانیان، ڕووبەڕووی یاسا و زیندوێتی ڕای گشتی كۆمەڵگە بكەینەوە.

لە ڕۆژی جیهانیی ڕیشەكێشكردنی تووندوتیژی دژی ژنان، ئێمە لێرەین تا هەموومان پێكەوە، پشت و پەنای كچ و ژن و دایكە شۆرشگێڕ و نوێخوازەكانی كوردستان بین.

پێكەوە باوك و برا و كەسوكاربین بۆ پاراستنیان، بۆ پێشخستنیان، بۆ گەشەدان بە تواناكانیان، بۆ سەرخستنیان بۆ پێگەكانی ڕابەڕایەتی كردن.

بە درێژایی مێژووی گەلان، ژنان و كچانی كوردستان سێمبولی گەلیكی زیندوو، ئازا و ئازاد بوون... دڵنیابن كە ئێمە لە سەرۆكایەتیی یەكێتیی نیشتمانیی كوردستان تێ دەكۆشین، ئەو سێمبولە بپارێزین و بەهێزی بكەین.
131 جار خوێندراوه‌ته‌وه‌
11/25/2020 10:19:07 AM
زیاتر ...
زۆرترین خوێندراو
  • 24 کاتژمێر
  • هەفتە
  • مانگ