هەواڵ
ئەندامێکى سەرکردایەتى یەکێتى نامەیەک ئاڕاستەى نێچیرڤان بارزانی سەرۆکی هەرێمی کوردستان دەکات
 ئاراسته‌:عه‌بدول نه‌جم




ئەندامێکى سەرکردایەتى یەکێتى نامەیەک ئاڕاستەى نێچیرڤان بارزانی سەرۆکی هەرێمی کوردستان دەکات ڕایدەگەیەنێت..لە سنوری پارێزگای دهوک  ئەوەیڕویداوە بەرامبەر ئەوسێ نوخبەیە جگە لەوەی کە پێشێڵکردنی سەروەری یاساو مافی مرۆڤ بوو ، لەهەمان کاتدا شکاندنی شکۆی مامۆستاو شکۆی قەڵەم و پەیڤ و شکۆی پەرڵەمانی کوردستان بوە .


نامەیەکی کراوە بۆ بەرێز نێچیرڤان بارزانی سەرۆکی هەرێمی کوردستان 

دەقى نامەکە وەک خۆى...

سڵاورێز ...

سەرەتا دەمەوێ دور لە ئینتیمای حزبایەتی و ، وەکو هاوڵاتییکی پارێزگای دهوک لەسەر شکاندنی شکۆی مامۆستایان و رۆژنامەنووسان و پەرلەمانتاران ئەم نامەیەتان ئاراستە بکەم  .
بەرێز سەرۆکی هەرێم : هەرچەندە ئەمە یەکەم جارنییە لە سنوری پارێزگای دهوک لەسەر بابەتی موچە مامۆستایان رووبەرووی ئەشکەنجەو زیندانیکردن دەبنەوە ، سەرەرای شکاندنی شکۆی مامۆستان کۆمەڵێک تومەتی نابەجێش دەخرێنە پاڵیان و بە تۆمەتی وەک خۆیان دەڵێن (پیلان وسیخۆریکردن بۆ وڵاتانی ئیقلیمی و بە هاندانی لایەنێکی سیاسی کوردستانی تومەتباریان دەکەن)!!. بەڵام رووداوەکەی دوو رۆژلەمەوبەری شاری دهوک هەموو سنورێکی تێپەران ولەیەک کاتدا سێ نوخبەی گرنگ کەلەسەر ئاستی جیهان (حەسانە)یان هەیە کەوتنە بەر پەلاماردانێکی زاڵمانە و بەشێکی زۆریان راپێچی زیندانەکانی ئەو شارەکران . ئەوانیش مامۆستایان کە لە رێپێوانێکی هێمنانەدا بەرەو پارکی ئازادی دەچون، نوخبەی دووەم ئەو رۆژنامەنووسانەبوون کە وەک ئەرکی رۆژنامەوانی و کارێکی ئاسایی خۆیان رووماڵی هەواڵەکەیان دەکرد . سێیەمیش پەرلەمانتارێکی ژن بوو وەکو ئەرکی خۆی هەوڵیدەدا وەک نوێنەری خەڵکی ئەو شارە بەدوواداچون بۆ ئەو بابەتە بکات و گوێ لەداواکاری مامۆستایان بگرێت .
 بەداخەوە  ئەوەی کە دەزگا ئەمنییەکان بەبریاری بەرپرسی یەکەی ئیداری ئەو شارە بەرامبەر ئەوسێ نوخبەیە ئەنجامدا ، جگە لەوەی کە پێشێڵکردنی سەروەری یاساو مافی مرۆڤ بوو ، لەهەمان کاتدا شکاندنی شکۆی مامۆستاو شکۆی قەڵەم و پەیڤ و شکۆی پەرڵەمانی کوردستان .
بەرێز سەرۆکی هەرێم : شکاندنی شکۆی مامۆستا بەواتای شکاندنی هەموو گەلی کوردستان دێت ، هەر لە هاوڵاتیێکی ئاساییەوە تا دەگاتە بەرپرسە باڵاکانی حزبی و حکومی . چونکە هەموویان پەروەدەی دەستی مامۆستان .
شکاندنی شکۆی پەرلەمانتارو تۆمەتبارکردنی بە جاسوسیکردن بۆ وڵاتێکی دەرەکی ، ئەمەش بەواتای شکاندنی شکۆی پەرلەمان وهەمووخەڵکی کوردستان دێت . چونکە ئەمانەش نوێنەری راستەقینەی خەڵکی کوردستانن .
بەرێز سەرۆکی هەرێم : مامۆستایانی دهوک نەچوونەتە بەردەم هیچ دەزگایەکی حکومی یان بارەگایەکی حزبی ، پەلاماری هیچ شوێنێکیان نەداوە ، ناوی هیچ کەس و لایەنێکی لەکەدارنەکردووە ، بەڵکو بە شێوازێکی زۆر هێمنانە تەنها داوای موچەیان کردووە ، کەچی وەکو تاوانبار مامەڵەیان لەگەڵداکراوە و پارکی ئازادی یان لێکرا بە شوێنی ئەشکەنجەدان و ناسناوێکی دیکەیان بەخشی بەو پارکە . 
وەلێ ئەگەر داواکردنی موچە بە تێگەیشتنی پارێزگاری دهوک تاوان و پیلان بێت و ، هەر کەسێ داوای موچە بکات سزابدرێن و زیندانی بکرێت ، ئەوا پێویستە سەرجەم فەرمانبەرا و موچەخۆرانی هەرێمی کوردستان زیندانی بکرێن ، چونکە هەموویان داوای موچە دەکەن لە هەندێ شوێن داواکاری زیاتریشیان هەیە .لەهەمان کاتدا ئەگەر بەپێی حوکمی پارێزگاری دهوک بێت پێویستە سەرکردایەتی یەکێتی وبەشێک لە حزبە سیاسیەکانی دیکەش زیندانی بکرێن !. چونکە ئەوانیش لە کۆبوونەوەی فەرمی خۆیاندا و بەپەیامێکی فەرمی پشتگیری خۆیان بۆ دابینکردنی موچەخۆران دەربریووە .
هەروەها ئەگەر بڵاوکردنەوەی هەواڵی مامۆستایان تاوان بێت و هەرکەسێک هەوڵی روماڵکردنی هەواڵی خۆپیشاندانی مامۆستایانی دهوک  بدات ئەشکەنجە بدرێت و راپێچی زیندانەکان بکرێت ، ئەوا دەبێ کەناڵی رووداو دابخرێت و کاکە شاهۆ ئەمین ی بێژەرو پێشکەشکاری دیاری کەناڵەکەش بەدوای سەیارەیێکەوە ببەستنەوەو بەرەو زیندان رابکێشن .چونکە ئێوارەی ئەو رۆژە بە حەماسەتێکی زۆرەوە هەواڵەکەی خوێندەوە!. 
بەرێز سەرۆکی هەرێم : سەرەری ئەو هەموو ستەم و زوڵمەی کە ئیدارەی دهوک بەرامبەر بە مامۆستایان و رۆنامەنووسانی ئەو شارە ئەنجامیان داوە ، سەرەرای پێشێلکردنی سەروەری یاسا ، سەرەرای نیگەرانکردنی سەرجەم جەماوەری پارێزگای دهوک بەجیاوازی بیرورای سیاسییەوە . هەروەها لەکاتێکدا کە هەموو خەڵکی کوردستان چاوەروانی ئەوەبوون کە پارێزگاری دهوک لە پەیامێکی فەرمیدا داوای لێبوودن لە مامووستایان و رۆژنامەنووسان و پەرلەمانتاران و خەڵکی دهوک بکات و، بریاربدات کەرێکاری یاسای بگرێتە بەر لە دژی ئەوانەی کە سوکایەتییان بە مامۆستایان و رۆژنامەنووسان کردووە . چاوەروانی ئەوەیان دەکرد کە پشتگیری لە داواکاری فەرمانبەران و موچەخوران بکات ، راشی بەگەیەنێت کە کاتی ئەوە هاتووە ئیدارەی دهوکیش داوای مافی خۆی بکات و ناکرێ زۆرتریت داهات لە پارێزگای دهوک بێت ، بەڵام زۆرتریت رێژەی هەژاری و بێ کارییش پشکی ئەو پارێزگایەبێت !. ناکرێ کەمترین ئاوەدانی و خزمەتگوزاری و پرۆژەی ستراتیژی لە پارێزگای دهوک جێبەجێ بکرێن . چاوەروانی ئەوەبوون کە پارێزگاری دهوک بڵێت خەڵکی دهوک شایستەی ئەوەن وەکو هەولێرو سلێمانی بەفرۆکەخانەی خۆیان شادبن . شاستەی ئەوەن کە وەکو سلێمانی و هەولێر سنوری پارێزگاکەیان لە دەیان ملیون مین و پاشماوەکانی جەنگەوە پاکبکرێتەوە . چاوەروانی ئەوەبوون جەنابی پارێزگار بڵێت تاکەی فەرامۆشکردنی دهوک بەردەوام بێت و هێشتا نزیکەی (400)گوندی ئەو پارێزگایە چوڵن وپێویستی بە ئاوەدانی و خزمەتگوزاری و دابینکردنی کەشێکی گونجاوی سەقامگیری ئەمنی هەیە بۆ ئەوەی هاوڵاتیا وەکو دێهاتەکانی هەولێرو سلێمانی و هەڵەبچە بگەرنەوە سەر دێهاتەکانی خۆیان . چاوەروانی ئەوەبوون پارێزگاری دهوک لە کۆنگرەیێکی رۆژنامەوانیدا بڵێت  ئیدی بیارماندا لە پێناو خزمەتکردنی هاوڵاتیانی پارێگای دهوک و، بو ئەوەی چیتر دەیان هاوڵاتی پارێزگای دهوک بەمەبەستی رایکردنی مامەڵەکانیان نەچنە هەولێر و بەرێگاوە نەبنە قوربانی روداوەکانی هاتووچو، بۆیە  وەک ئیدارەی دهوک ئێمەش بریارماندا  پرسی لامەرکەزیی (کاگێریی ودارای )تاوتوێ بکەین  .  کەچی بەداخەوە پارێزگاری دهوک لە دوخێکی شڵەژاویدا دەرکەوت و دەستی کرد بە هەرەشەو تومەت بەخشین بە مامۆستاو رۆژنامەنووسان. راشیگەیاند بەپێی یاساکانی پارێزگاوحکومەت ئیجرائات دەکەن !!. هەروەها بەسەرسورمانەوە رایگەیاند کە هەندێکیان مامۆستانین بەبێ ئەوەی بیر لەوە بکاتەوە کە هەموو فەرمانبەرو موچەخوران داوای موچە دەکەن نەک تەنها مامۆستا . ئەوەی لە هەمووی سەیروسەمەرەتر ئەوەبوو کە ووتی هەندێکیان بەنهێنییەوە سەردانی سلێمانییان کردووە و لەگەڵ بەرێز لاهۆر شێخ جەنگی کۆبووتەوە بەمەبەستی ئەنجامدانی رێکخستنی ئەم خۆپیشاندانە!.لەمەشدا جەنابی پارێزگار لەبیری چووە کە زیاتر لە دوو مانگە قەدەغەی هاتووچو لە نێوان شارەکاندا هەیەو  هەرکەسێک لە دهوکەوە بچێتە سلێمانی دەبێ موڵەت لە جەنابی پارێزگار وەربگرێت و لەسنوری پارێزگای هەولێریش ناتوانێت تێپەربێت و بگاتە سلێمانی تا رەزامەندی وەزیری ناوخۆ وەرنەگرێت . هەروەها لەبیری چووە کە ئەگەر بشگاتە سلێمانیش (15) رۆژ کەرەنتینە دەکرێت و کاتێ لە سلێمانییەوە بگەرێتە دهوکی دیسانەوە ناوی دەنووسرێت و کەرەنتینە دەکرێت . واتە ئەو کەسە ناوی لە هەرسێ پارێزگا تۆمار دەکرێت .لەمەدا جەنابی پارێگاری دهوک ریسەکەی لێ بوبەخووری و هەر زوو سینایۆیەکەی کەشف بوو .
بەرێز سەرۆکی هەرێم : بە بەڵگەوە سەلماندمان ئەو کەسەی کە پارێزگاری دهوک دەڵێت بە نهێنییەوە چووەتە سلێمانی تەنها سیناریۆیێکی درۆستکراوەو بۆداپۆشینی شکستی ئیداری خۆیەتی . هەوروەها هەوڵێکە بۆ کەمکردنەوەی ئەو نیگەرانییە زۆرەی لەسەر ئاستی جەماوەری دهوک و هەموو هەرێمی کوردستان بەرامبەر زیندانیکردنی مامۆستایان و رۆژنامەنووسان دروست بووە .
  بەرێز هاوسەرۆکی یەکێتی و حزبەکەشی نەک بەنهێنی بەڵکو بەئاشکراو بەفەرمی لە دوا کۆبوونەوەی خۆیاندا وەک ئەرکێکی سەرشانی خۆیان پشتیوانی خۆیان بۆ داواکاری مامۆستایان دەربریووە و پێویست بەوەناکات بەنهێنییەوە پشتیوانی لە داواکاری مامۆستایان و موچەخۆران بەگشتی بکەن .
بەرێز جەنابی سەرۆکی هەرێم : هەرچەندە خۆپیشاندانەکانی عیراق بەراورد ناکرێت لەگەڵ خۆپیشاندانی مامۆستایانی دهوک . چونکە لە دهوک کۆمەڵێک مامۆستاو فەرمانبەران بە شێوەیێکی هێمنانە لە ناو پارکێکی ئەو شارەدا تەنها داوای موچەکانیان کردووە . بەڵام  خۆپیشاندانەکانی باشورو ناوەراستی عیراق داوای گۆرینی دەسەڵات و دادگایکردنی بەرپرسانی عیراقیان دەکرد ، دەیان بارەگای حزب و لایەنەسیاسییەکان سوتێنران ، دەیان سەیارە و ماڵی بەرپرسە حزبی و حکومییەکان تاڵانکران ، کوشتارو توندوتیژیەکی زۆر لە نێوان هەردوولا لێ کەوتەوە ، دەیان پردوو شوێنی گشتی وجاددەی ستراتیجی لەلایەن خۆپیشاندەرانەوە داخران . لەو کاتەدا وەکو هاوڵاتییەکی هەرێمی کوردستان خۆشحاڵ بووم کە جەنابت وەکو سەرۆکی هەرێمی کوردستان پشتگیری خۆتان بۆ داواکاری خۆپیشاندەرانی عیراق دەربری و داوای ئازادکردنی ئەو خۆپیشاندەرانەت کرد کە لەلایەن هێزە ئەمنییەکانی عیراقەوە گیرابوون . بۆیە لە کۆتایدا داوا لەبەرێزتان دەکەم وەکو سەرۆکی هەرێم و پارێزەری پاراستنی یاساکانی هەرێمی کوردستان هاوشێوەی خۆپیشاندانەکانی عیراق پشتگیری لە داوا رەواکانی مامۆستایانی دهوک بکەن وبە بریاری ئازادکردنی دەستگیرکراوەکانی دهوکیش  کە  بەشێوەیێکی نایاسایی دەستگیرکراون . دڵی جەماوەری دهوک و هەموو خەڵکی کوردستان خۆش بکەن بۆئەوەی بەر لە جەژنی رەمەزان ئەوانیش بگەرنەوە ناو ماڵ و خێزانەکانیان . لەگەڵ پێکهێنانی لیژنەیێک بۆ بەدواداچونی ئەو رووداوە و دەرخستنی راستیەکان بۆ خەڵکی کوردستان تاوەکو چیتر رێگانەدرێت بەناوی یاساوە لە پارێزگای دهوک یاساو مافی مرۆڤ پێشێل بکرێت .هەروەها وەکو پارێزگاکانی دیکەی هەرێم ئەو مافە بەجەماوەری پارێزگای دهوکیش بدرێت بۆئەوەی بتوانن داوای مافەکانی خۆیان بکەن و مافی خۆپیشاندان و رپَپێوانی هێمنانەیان هەبێت . چونکە جەماوەری دهوک شایستەی رێزلێنانن نەک سزادان .
لەگەڵ رێزمدا ....
                                                     لەتیف نێروەیی
1084 جار خوێندراوه‌ته‌وه‌
5/20/2020 9:55:14 AM
زیاتر ...
زۆرترین خوێندراو
  • 24 کاتژمێر
  • هەفتە
  • مانگ