دۆسیە
كاریگه‌ریه‌كانی بایكۆتكردنی كاڵای توركی چی ده‌بێت؟
 ئاراسته‌:عه‌بدول نه‌جم

بەهۆى بەردەوامبوونی لەشکرکێشییەکانی تورکیا بۆ سەر ڕۆژئاوای کوردستان، بەشێک لە هاووڵاتیانی هەرێم لە تۆڕە کۆمەڵایەتییەکان، هەڵمەتێکیان بۆ بایکۆتکردن و بەکارنەهێنانی کاڵای تورکی ڕاگەیاندووە و داوا دەکەن چیتر هاووڵاتیان کاڵای تورکی بەکارنەهێنن.


بەرەنگاریی دژبە فاشیزمی تورکی ئەرکێکی ئەخلاقی و نەتەوەییە

به‌ دروشمی بەرەنگاریی دژبە فاشیزمی تورکی ئەرکێکی ئەخلاقی و نەتەوەییە هەڵمەتێکی هۆشیارکردنەوەی خەڵک لەسەر چۆنیەتی بایکۆت و مەترسییەکانی خۆراکی تورکی له‌ شارو شاروچكه‌كانی هه‌رێمی كوردستان ده‌ستی پێكردوه‌.
بایکۆتی كاڵای توركی و دەرەنجام و لێکەوتەکانی چین  و چی ده‌بێت  خۆێندنه‌وه‌ی هاولأتیان و ڕۆشنبران چی یه‌ له‌باریه‌وه‌ و له‌م ڕاپۆرته‌دا زیاتر بخۆێنه‌وه‌ره‌وه‌



ناکرێت وڵاتێکی وەک تورکیا لەشکرکێشی بۆ سەر ڕۆژئاوای کوردستان بکات


بەشێک لە هاووڵاتیانى کوردستان لە هەژمارەکانی خۆیان ئاماژە بەوە دەکەن، ناکرێت وڵاتێکی وەک تورکیا لەشکرکێشی بۆ سەر ڕۆژئاوای کوردستان بکات و هاووڵاتیانی کورد بکوژێت و خەڵکیش کاڵای تورکی بەکاربهێنن و پێویستە سەرجەم کاڵا تورکییەکان بایکۆت بکرێن.


گەرورەترین چەکێک کە دژی ئێمە بەکاریدێنن هەڕەشەیە لە داخستنی سنورەکان 


به‌ همه‌ن تاهیر نه‌ریمان  نوسیوێتی :بایکۆتکردنی کاڵای تورکی؛ هەنگاوێکە بۆ ئەوەی هەرێمی کوردستان لە دەواجنێکەوە بەرەو پشتبەستن بە بەرهەمی ناوخۆ هەنگاوبنێت. ئێمەی دەستسپی و بێبەرهەم و بەکاربەر؛ بەرەو بەرهەمداریی و دەستڕەنگینی هەنگاودەنێین. بەدەواجنکردنی هەرێمی کوردستان؛ بەشێکە لە سیاسەتی لەپەلپۆخستنی ئەم هەرێمە و تۆ ئەم هەنگاوە دەنێیت، خۆت لەو سیاسەتە هەرێمییە ڕادەپسکێنیت و ئاکتێکی سیاسیی گرنگ دەکەیت، تەنها هەڵوێست نییە و تەواو.
ده‌شڵیت:گەرورەترین چەکێک کە فاشزمی نەتەوەیی سەردەستەکان دژی ئێمە بەکاریدێنن، هەڕەشەیە لە داخستنی سنورەکان بەڕوماندا، لە ڕیفراندۆمدا فاشزمی تورک و فارس داخستنی سنوریان وەک چەک دژی ئێمە بەکارهێنا. ئێستا تۆ کە بایکۆتی بەرهەمی تورکیا دەکەیت، چەکەکە دەکەوێتە دەستی تۆ. ئەردۆگانی فاشیست، لە ڕیفراندۆمدا دەی گوت (ئێمە سنورەکانت بەڕودا دابخەین، کێ بە فریات دەکەوێت؟). بۆ ئەوەی بەفریای خۆمان بکەوین هەر دەبێت بیر لە(خۆژێنی و خۆبژێوی) بکەینەوە، لەگەڵ هەموو بەدبەختییەکی کوردستانییەکاندا، لەوەدا خۆشبەختین کە نیشتمانێکمان هەیە، نەک خۆی، لەباریدایە زۆر خەڵکی تریش بژیەنێت.


بایكۆت شێوازێکی جوان و دروستی ناڕەزایی دەربڕین و قبوڵنەکردنە


ئاڵا ئەحمەد یش ده‌ڵیت :بایکۆتکردن و مامەڵەنەکردن بە هەر شتێک یان بە هەر سیاسەت و لەگەڵ هەر لایەنێک،شێوازێکی جوان و دروستی ناڕەزایی دەربڕین و قبوڵنەکردنە.
دەستەواژەی "بایکۆت" بە واتاکەی شتێکی تازە و نامۆ نییە و مێژوویەکی کۆنی هەیە،لە کۆنەوە بەشێک بووە لە هەڵوێستی لایەنی ناڕازی بەرامبەر بەوەی جێگای قبوڵکردن نەبووە.دیارترینی مێژووش بۆ ئەمە، کەسایەتی شۆڕشگێڕ و ئاشتیخواز (ماهاتما گاندی) سەرکردەی مەزنی هندستانە، کە وەک ناڕەزایەتییەک بەرامبەر سیاسەتەکانی بەڕیتانیا، هەڵسا بە بایکۆتکردنی کاڵای بەڕیتانی و هەرخۆشی لەوە بەدوا جل و بەرگ پێویستیی خۆی دابین ئەکرد، ئەوەش کاریگەرییەکی زۆری لەسەر تەواوی هند هەبوو بە وەرگرتنی هەمان هەڵوێست لە لایەن کۆمەڵگای هندییەوە، کە گورزێکی کوشندە بەر ئابوری بەڕیتانیا کەوت.ئێستا و بۆ کوردستان ناڕەزایی لە جۆری بایکۆتکردن بەرامبەر سیاسەت و مامەڵەی زۆرێک لە دەوڵەتان کە کوردستان بازاڕی ساغکەرەوەی کاڵا و بەرهەمەکانیانە، لە نێویشیان تورکیا، پێویستییە.

بایکۆتکردنی کاڵا و بەرهەمە تورکییەکان بەو ڕاددەیەش ئاسانە


بەڵام ئایا بایکۆتکردنی کاڵا و بەرهەمە تورکییەکان بەو ڕاددەیەش ئاسانە؟!وەک هەڵوێستەکە شتێکی ئاسان و جوانە، بەڵام کایگەری ئەرێنی و نەرێنیشی ئەبێت.ئەرێنییەکەی زیانگەیاندنە بە ئابوری تورکیا بەرامبەر سیاسەتە نادروستەکانی.دیوی نەرێنی ئەم هەڵوێستەش ئەوەیە، کە لە کاتێکدا بازاڕەکانی کوردستان بە کاڵای تورکی تەنراون، جێگرەوە نییە بۆیان، پێویستییەکان دابین نابن.لە ڕابردوو بینرا یەکێک لە دەرەنجامەکانی ڕیفراندۆم نەناردنی بەرهەم و داخستنی سنورەکان بوو لەلایەن دەوڵەتانی دەور و بەر، و بینرا بە ماوەیەکی کورت چەند و چۆن نرخ بەرزبۆوە، ئەمەش کاریگەری بایکۆتکردن بەتەواوی ڕوون ئەکاتەوە.

ئه‌گه‌ر كوردستان بایكۆت بكات لە کوێوە هاوردە بکات


ئێرانیش یەکێکە لەو دەوڵەتانەی کاڵاکانی لە کوردستان ساغ ئەکرێتەوە، سزاکانی سەر ئێرانیش زیاتر و زیاتر ئەبن، ئەگەرێکی دوور نییە کە عێراق ناچار بکرێت ئاڵوگۆڕی بازرگانی لەگەڵ ئێران ڕابگرێت و سنورەکانی بە ڕوویدا دابخات.وە لە ئەگەری ڕوودانی ئەمەشدا کوردستان کە هاوسنوری هەردوو دەوڵەت و عێراق و سوریایەکی بێ بەرهەمە، لە کوێوە هاوردە بکات؟
ئەگەر لەڕووی کاڵاشەوە جێگرەوە هەبێت لە لایەکیتر و لە وڵاتانیتر، بەڵام دواجار سنورەکان ڕێگرن لەو هاوردەیە و ئەگەرێکی کراوەیە نەتوانرێت کە لە ڕێگای سنورەکانی بەستراو بە عێراقیشەوە هاوردە بکرێت.گرنگتر لە بایکۆتکردن کارکردنە لەسەر کەرتی وەبەرهێنان و پیشەسازی کوردستان.پێویستە لایەنی پەیوەندیدار و سەرمایەداران کار بۆ زیادکردنی بەرهەمی ناوخۆیی بکەن و کەرتی پیشەسازی وەبەرهێنان پێشبخەن و سەرمایەکەیان بۆ ئەو مەبەستە بەکاربێنن، کەرتی نیشتەجێبوون و گەشتیاریی پێویستتر نین لەوە.
بەمەش هەم ئابوریی کوردستان بەهێز ئەبێت،و هەم خەڵکانێکی زۆر هەلی کاریان بۆ ئەڕەخسێنرێت، هەمیش هیچ کام لە دەوڵەتان کارتی فشاری داخستنی سنوریان بەڕووی کوردستاندا بەدەستەوە نامێنێت، کەرتی کشتوکاڵیش کەرتێکی گرنگە و ئاسان ئەکرێت پێشبخرێت.کاتێک ئەتوانرێت گورزی کوشندەی ئابوری لە دەوڵەتانی سیاسەت قێزەون بدرێت کە ئابوری کوردستان ئابورییەکی بەهێز بێت،بایکۆت هەڵگری زۆر پەیامی سیاسییە و پێویستە بە وریایی هەموو ئەگەرەکان پێشبینی بکرێت.بۆیە پێویستترین و گرنگترین ئەوەیە کە "کاربکرێت بۆ وەگەڕخستن و پێشخستنی کەرتی پیشەسازی و کشتوکاڵی کوردستان".

پێویستە هەرکەسێک لە پێگەو توانستی خۆیەوە بەرەنگاریی و فشارو وەڵامدانەوەی تورکیزم ببێته‌وه‌

هەڵمەتێکی هۆشیارکردنەوەی خەڵک لەسەر مەترسیەکانی کاڵای تورکی و چۆنێتی بایکۆتکردنی لەلایەن فێرخوازانی زانکۆی ڕاپەڕین دەستی پێکردوه‌نەوزاد مەرگەیی ئەندامی کەمپینی دژبە کاڵای تورکی ڕایگه‌یاندوه‌ :کورد گەورەترین نەتەوەی بێ دەوڵەتە، ئەمەش لە سایەی بەردەوامبوونی داگیرکاری، جەنگ، فیکری فاشیستی و شۆڤینی و ڕەگەپەرستی دژ بە گەلی کورد.بەرەنگاریی و فشارو وەڵامدانەوەی تورکیزم و داگیرکەرییەکان تەنها بە جەنگ ناکرێت، پێویستە هەرکەسێک لە پێگەو توانستی خۆیەوە بە فکر، ئیرادە، ئابوری و ئازادیخوازی دژ بە کلتوری تورکیزم بجەنگێت.
بەبۆچوونی ئەو چالاکوانانە، بەشداربوونی خەڵک لە چالاکیە جیاجیاکانی بەرەنگاربوونەوەی داگیرکەری دژ بە تورکیا لە ڕێگەی هەڵمەتیی بایکۆتی کاڵای تورکی، میدیا، سینەما وەکو هەڵوێستێک بۆ پشتیوانی لە ڕۆژئاوای کوردستان پێویستەو هەروەها بەشداربوونی خەڵک لە چالاکی مەدەنی دژی داگیرکەری لەسەر کوردستان و بەها کۆمەڵایەتیەکان و بازاڕ ئەرکێکی نیشتیمانی و ئەخلاقییە.
1190 جار خوێندراوه‌ته‌وه‌
10/22/2019 2:35:16 PM
زیاتر ...
زۆرترین خوێندراو
  • 24 کاتژمێر
  • هەفتە
  • مانگ