بیروڕا
له‌ كانی‌ ئاشتییه‌وه‌ بۆ كانی‌ خوێن
ئازاد ئیبراهیم ئەحمەد

ئه‌و له‌شكركێشییه‌ی‌ ڕه‌جه‌ب ته‌یب ئه‌ردۆغان ئه‌مڕۆ له‌ خۆرئاوای‌ كوردستاندا ناوی‌ ده‌نێت كانی‌ ئاشتی ، له‌ساڵی 1974 ده‌سه‌ڵاتدارانی‌ ئه‌وكاتی‌ توركیا له‌ قوبرس ناویان لێنا «كرده‌ی‌ ئاشتی» و له‌ ساڵی 1992یش به‌ناوی‌ هێزی ئاشتی پارێزه‌وه‌ هاتنه‌ باشوری‌ كوردستان و تاكو ئێستا (35) بنكه‌ی‌ سه‌ربازیان له‌ باشور هه‌یه‌، له‌هیچ یه‌كێك له‌و كردانه‌دا كه‌ توركیا وشه‌ی‌ «ئاشتی» ده‌خاته‌ پاڵ، به‌ڕاستی ئاشتی به‌رهه‌منه‌هاتووه‌، ئه‌وه‌ی‌ مه‌رامی ئه‌و ئاشتییه‌ بووه‌ ته‌نها داگیركردنی‌ خاكی وڵاتانیتر بووه‌.
مادام مسته‌فا كه‌مال ئه‌تاتوركی باوكی ڕۆحی توركه‌كان نه‌یتوانی‌ كه‌مالیه‌تی خۆی‌ بسه‌لمێنێت و كار به‌ دروشمه‌ به‌ناوبانگه‌كه‌ی‌ خۆی‌ بكات كه‌ ده‌یوت «ئاشتی له‌ ناوه‌وه‌ و ئاشتی له‌ ده‌ره‌وه‌»، زۆر ئه‌سته‌مه‌ وه‌چه‌كانی‌ ئه‌و پیاوه‌ی له‌سه‌ر داروپه‌ردووی عوسمانی‌ ده‌وڵه‌تی توركیای دروست كرد بتوانن ئاشتی له‌ ناوخۆوه‌ په‌لكێشی ده‌ره‌وه‌ی‌ خۆیان بكه‌ن. به‌پێچه‌وانه‌وه‌ هیچ وڵاتێكی ناوچه‌كه‌ له‌ ئێستادا هێنده‌ی‌ توركیا ده‌ستی له‌ناسەقامگیری ناوچه‌كه‌دا نییه‌ و هیچ وڵاتێكیش هێنده‌ی‌ توركیا چاوی له‌ خاكی وڵاتانیتر نییه‌.
هێرشه‌كانی‌ توركیا بۆ خۆرئاوای‌ كوردستان و خۆرهه‌ڵاتی‌ فورات، دوای‌ هه‌فته‌یه‌ك له‌به‌رده‌وامی‌، ده‌ركه‌وت كه‌ نه‌ك كانی‌ ئاشتی نییه‌ ، به‌ڵكو كانی‌ خوێنه‌. ته‌نانه‌ت كانی‌ ئاشتی! ئه‌ردۆغان هیچی له‌و ئاشتییه‌ ده‌ره‌كییه‌یش نه‌چوو كه‌ ئه‌تاتورك وه‌ك هوتافی مانه‌وه‌ی‌ مێژوویی خۆی‌ هه‌ڵیگرتبوو و بانگه‌شه‌ی بۆ ده‌كرد.
كانی‌ ئاشتی ڕه‌جه‌ب ته‌ییب ئه‌ردۆغان ناوێكه‌ وه‌ك هه‌ر ناونان و سیناریۆیه‌كیتری‌ دیماگۆچی بۆ هه‌ڵخه‌ڵه‌تاندن و به‌ هه‌ڵه‌بردنی‌ كۆده‌نگی جیهانییه‌ له‌ ئاست ئه‌و زوڵم و نادادییه‌ی‌ كه‌ ئه‌ردۆغان و سوپاكه‌ی‌ له‌ خۆرئاوای‌ كوردستاندا ده‌ستیان داوه‌تێ و ده‌ستپارێزی له‌ گه‌وره‌و بچوكی كورد ناكه‌ن.
له‌گه‌ڵ ته‌قین و قوڵپدانی‌ ئه‌و كانییه‌ ئاشتییه‌!، وێنه‌یه‌كی ته‌واو ئاوه‌ژوو و شێوێنراوی مافی مرۆڤ و یاساو ڕێسا جیهانییه‌كانمان به‌رچاوكه‌وت كه‌ چه‌ند به‌ ناته‌واوی‌ له‌به‌رامبه‌ر كورددا به‌كارهێنراون. هه‌ڵكه‌ندنی كانییه‌ ئاشتییه‌كه‌ی‌ ئه‌ردۆغان له‌ خاكی كورداندا گه‌لێك زه‌حمه‌ته‌ ببێته‌سه‌رچاوه‌ی‌ ژیان و پێكه‌وه‌یی پێكهاته‌كانی‌ ناوچه‌كه‌، چونكه‌ له‌ بنه‌ڕه‌ته‌وه‌ ئه‌م كانییه‌ سه‌رچاوه‌ی‌ مه‌رگ دۆستییه‌ نه‌ك ژیان دۆستی.
توركیا ده‌وڵه‌تی‌ ئاشتی نییه‌ به‌ پێوه‌ری‌ پێگه‌ جوگرافییه‌كه‌ی‌. به‌و پێیه‌ی‌ توركیا وڵاتێكه‌ له‌ لێواری‌ هه‌م ئه‌وروپاو هه‌م ئاسیادایه‌، ئه‌وا هه‌میشه‌ توركیا چاوی له‌وه‌یه‌ نازی‌ گه‌وره‌یی و خاوه‌ن شكۆیی خۆی به‌سه‌ر وڵاتانیتری‌ ناوچه‌كه‌دا بكات و وه‌ك نوقته‌ وسولی نێوان دوو جیهان ده‌ربكه‌وێت، بۆیه‌ كه‌ هێرش ده‌كاته‌سه‌ر هه‌ر خاك و ئاو و میلله‌تێك وه‌ك هه‌ڵگری‌ په‌یامی ئاشتی خۆی‌ پیشان ده‌دات، ده‌یه‌وێت وا وێنای‌ كرده‌ پیلانگێڕییه‌كانی‌ بكات كه‌ توركیا هه‌ڵگری‌ باڵانسی ئاشتییه‌ له‌نێوان هه‌ردوولاداو ده‌بێت داینه‌مۆی ئاشتیش بێت بۆ خۆرهه‌ڵات و به‌رگریش له‌هه‌ر ناكۆكی و فیتنه‌یه‌ك بكات به‌ره‌و ئه‌وروپا بچێت، بۆیه‌ زۆرجاریش وڵاتانی‌ ئه‌مریكاو ئه‌وروپا به‌م سیحره‌ چه‌ندجاره‌یه‌ خه‌ڵه‌تاون.
به‌ڵام ڕاستی تێزێكی له‌و چه‌شنه‌ی‌ كه‌ توركیا هه‌ڵگری‌ په‌یامی ئاشتییه‌ بۆ ناوچه‌كه‌ یان نا ؟ له‌و قسه‌یه‌ی (نوری سه‌عید)دایه‌ كه‌ له‌ ساڵی 1928 له‌مه‌ڕ بۆری نه‌وتی «جیهان» ده‌ڵێت : ئێمه‌ بۆیه‌ له‌گه‌ڵ توركیا له‌و پرسه‌داو له‌و كاته‌دا نه‌گه‌شتینه‌ ڕێككه‌وتن چونكه‌ توركیا بچێته‌ هه‌ر خاك و جوگرافیایه‌ك لێی ناكشێته‌وه‌ و داگیری ده‌كات. كه‌واته‌ لێره‌وه‌ بۆمان ده‌رده‌كه‌وێت كه‌ توركیا هه‌ڵگری‌ خه‌ونی ئاشتی نییه‌ ئه‌وه‌نده‌ی‌ هه‌ڵگری‌ خه‌ونی زیندووكردنه‌وه‌ی‌ خه‌لافه‌تی عوسمانی‌ و گه‌یشتنه‌وه‌یه‌تی به‌ناوچه‌كانی‌ ژێر ده‌ستی ئه‌و خه‌لافه‌ته‌ له‌جاراندا.
‌‌ زیاتر ...
شه‌هریه‌ احمد
ئاری عومه‌ر
ئازاد ئیبراهیم ئەحمەد
زۆرترین خوێندراو
  • 24 کاتژمێر
  • هەفتە
  • مانگ