بیروڕا
عەبادی لەبەردەم دەرگاکەدایە
ئازاد ئیبراهیم ئەحمەد

ئەگەرچی (عادل عەبدولمەهدی) ئەمجارە نایەوێت دەست لەپۆستەکەی بکێشێتەوەو وەک سیاسییەکی ڕاڕا سەیر بکرێت، بەڵام ئەگەر عەبدولمەهدی دەست لەکار بکێشێتەوە، ئەوا بەبێ چاوەڕوانی حەیدەر عەبادی بۆ جارێکیتر دەگەڕێتەوەسەر کورسی دەسەڵات.

بەپێی ئەو زانیاریانە لە دانیشتنەکانی نێوان حەیدەر عەبادی و موقتەدا سەدر دزەی کردووە، ئێستا عەبادی و سەدر لەسەر گەلێک شت ڕێککەوتوون بۆ گەڕانەوەی عەبادی بۆسەر کورسی سەرۆکوەزیرانی. بەڵام دوو شت تا ئێستا بەربەستە لەنێوان هەردوولادا، لەلایەک دەبێت عەبدولمەهدی دەست لەکار بکێشێتەوە، لەلایەکیتریشەوە دەبێت حەیدەر عەبادی دەستبەرداری پێگەو بیرکردنەوە حیزبییەکەی ببێت.
وەک هەندێک لەناوەندە میدیاییەکانی عێراق ئاماژەی بۆ دەکەن، عەبادی لەبەردەم دەرگاکەدایەو تەنها ئەوەندەی ماوە لایەنە دڵخواستەکانی فەرمووی لێبکەن بۆناو کۆشکی سەرۆک وەزیرانی.
عەبدولمەهدی خاڵی لاوازی داوەتەدەست هەندێک لایەنی دژ کە داوای دەست لەکارکێشانەوەی دەکەن و بەردەوام  پەستان دەخەنەسەری تاکو چیتر لەو سیاسەتە نەرمەی ئێستای کە ناتوانێت بڕیار بدات لەیەکلاییکردنەوەی وەزیرەکان بۆ پۆستە بەتاڵەکانی حکومەتەکەی، هاوکات هەندێک لایەن و کوتلەی پەرلەمانیش داوای لێدەکەن لەبەرامبەر هەرێمی کوردستاندا قسەی هەبێت کە تاکو ئێستا هیچ بڕە نەوتێکی ڕادەستی ناوەند نەکردووە.
لەبەرامبەر ئەم خاڵانەی عەبدولمەهدیدا، عەبادی خاوەن خاڵی بەهێزە لەلای هەندێک لانی شیعی و کوتلەی ناو پەرلەمان. چونکە عەبادی بەشاسواری مەیدانی جەنگی داعش دادەنرێت لەلایەک و لەلایەکیتریشەوە عەبادی خاوەن تێڕوانینێکیترە بۆ پەیوەندی نێوان هەرێم و بەغداد.             
وەک هەندێک شیکەرەوەی سیاسی دەڵێن، لەدوای دوورکەوتنەوەی عەبادی لەپۆستی سەرۆک وەزیران، دوو شت لە عەبادیدا دەخوێنرێتەوە: یەکەمیان ئەوەیە عەبادی نایەوێت لەگەڵ کوردەکان هەماهەنگی بکات و نایەوێت لێیان نزیک ببێتەوە بۆئەوەی وێنایەکی وەهای نەدرێتێ کە جارێکیتر پشت بە کوردەکان دەبەستێت بۆ بوونەوە بە سەرۆک وەزیران، خاڵی دووەمیش ئەوەیە عەبادی چەند جارێک هێرشی کردۆتەسەر ئەولایەنانەی بێهەڵوێستن لەچۆنییەتی بەکارهێنانی سامانی عێراق و بەکارنەهێنانی ئەو سامانە بۆ هەموو عێراقییەکان کە زیاتر مەبەستی سامانی سروشتی کوردستانە.
یەک خاڵ گرنگە بۆ کوردەکان، ئەویش لەگەڵ عەبدومەهدی ڕێکبکەون و بڕی نەوتی پێویست ڕادەستی ناوەند بکات، ئەگینا بەم مامەڵەیەی ئێستای هەولێر لەگەڵ بەغداد دەرفەتی زیاتر دەداتە لایەنە عێراقییەکان کە عەبدولمەهدی دووربخەنەوەو عەبادی بێرنەوەسەر کورسی دەسەڵات، تەنانەت ئەگەر عەبدولمەهدی ئەم ویلایەتەیشی تەواو بکات بەم مامەڵە نەرمە لەگەڵ ئیقلیم ئەوا هەرگیز لایەنە عێراقییەکان چانسی دووبارە هەڵبژاردنەوەی پێنادەن، بەمەش کێشەو ناکۆکییەکان لەنێوان هەرێم و ناوەند ، چڕتر و قوڵتر دەبێتەوە.
‌‌ زیاتر ...
فه‌رید ئه‌سه‌سه‌رد
نەوزادی موهەندیس
د.ئه‌رسه‌لان بایز
فه‌رید ئه‌سه‌سه‌رد
ئازاد ئیبراهیم ئەحمەد
ئازاد ئیبراهیم ئەحمەد
هونه‌ر ره‌سوڵ ئه‌حمه‌د
زۆرترین خوێندراو
  • 24 کاتژمێر
  • هەفتە
  • مانگ