بیروڕا
له‌ پێشوازى ساڵى نوێدا 2021
بورهان شێخ ڕه‌ئوف

هه‌رچه‌نده‌ كات  ئاسایى ده‌ڕوات و هه‌موو ساڵ  وه‌رزه‌كان دووباره‌ ده‌بنه‌وه‌ ،ئه‌وه‌ مرۆڤه‌ ڕۆژمێرى بۆ ساڵ و مانگ و هه‌فته‌و ڕۆژ و سه‌عات و چركه‌ داناوه‌  وه‌كو یه‌كه‌ى پێوانه‌ى كات بۆ ڕاییكردنى كاروباره‌كانى له‌ هه‌موو بواره‌كانى ژیاندا به‌ خاس و خراپیه‌وه‌ .
له‌ كاتێكدا ساڵى 2020  مان به‌ڕێكرد به‌ هه‌موو كێشه‌و قه‌یرانه‌كانیه‌وه‌ ، ساڵێك كه‌ مرۆڤایه‌تى له‌ مێژووى دوورو درێژى خۆیدا ڕوبه‌ڕوى په‌تایه‌كى وا نه‌بووه‌ته‌وه‌ كه‌ هه‌موو وڵاتان  هاوڵاتیانى  خۆیان كرنتین بكه‌ن  له‌ ماڵه‌وه‌ و ژیان تووشى جۆرێك له‌  ئیفلیجى  بێت و ده‌رهاویشته‌كانى هێنده‌ قورس و فره‌ ڕه‌هه‌ندن له‌وه‌یه‌ بۆم نه‌كرێت له‌ وتارێكى وا كورتدا باسیان بكه‌م .
ساڵى 2020 جیهان  سه‌ره‌ڕاى كۆرۆنا ڤه‌یرۆس و كێشه‌و ململانێكانى ساڵانى پێشووترى وه‌كو شه‌ڕى یه‌مه‌ن و ململانێ ى ئێران و ئه‌مریكا و شه‌ڕى ناوخۆیى سوریا  شه‌ڕى توركیا و كورد ..تد ،  چه‌ندین  شه‌ڕو قه‌یران و ئاڵۆزی  تازه‌شى به‌ خۆیه‌ دى ، له‌وانه‌ شه‌ڕ له‌ لیبیا ، شه‌ڕى ئازه‌ربایجان و ئه‌رمینیا  له‌ سه‌ر هه‌رێمى نه‌گۆرنۆ كه‌ره‌باخ ، ململانێ ى خوێناوىله‌ هه‌رێمى تیگراى ئه‌سیوبیا ، زۆر كێشه‌و گرفتى تر له‌ كونو قوژبنى ئه‌م جیهانه‌ جه‌نجاڵه‌ .
هه‌ر له‌به‌ر هه‌موو ئه‌و كێشه‌و ئاریشه‌و قه‌یرانانه‌یه‌ كه‌ هه‌ندێك كه‌س گه‌یشتوونه‌ته‌ ئه‌و بڕوایه‌ی كه‌ ساڵى 2020 به‌ خراپترین ساڵى سه‌ده‌ى بیست و یه‌ك دابنێن به‌ هۆى كۆرۆناو جه‌نگه‌كانه‌وه‌ ، ڕاسته‌ له‌ سه‌د ساڵى ڕابردوودا مرۆڤایه‌تى زۆر كاره‌سات و ڕوداوى جۆراوجۆرى دیووه‌ هه‌ر له‌ كاره‌ساته‌ سروشتیه‌كانه‌وه‌  تا ئه‌وجه‌نگانه‌ى بنیاده‌م خۆى خووڵقاندوونى ، وه‌لى هیچیان وه‌كو  كۆڤید 19 ه‌یان  به‌ گێتى نه‌كردو هیچ ئومێدێكى خێراش له‌ ئاسۆه‌وه‌ دیار نیه‌ وا زوو كۆتایى به‌ نه‌هامه‌تیه‌كان بێنێت .
هه‌رچه‌نده‌ ڤاكسینى كۆرۆنا له‌ هه‌ندێك له‌ وڵاتان به‌رده‌سته‌و تا ڕاده‌یه‌ك دڵخۆشكه‌ره‌ ، به‌ڵام ڤایرۆسه‌كه‌ خۆى ده‌گۆڕێت و جۆرێكى خێراترى سه‌رى هه‌ڵداوه‌ ، به‌ڵام وادیاره‌ كێشه‌و گرفته‌كانى ساڵى 2020 بازده‌دات بۆ 2021 یش  به‌  كێشه‌و قه‌یرانه‌كانى ژینگه‌و ته‌ندروستیشه‌و تاوه‌كو ئێستا چاره‌ى بنه‌ڕه‌تیان بۆ نه‌دۆزراوه‌ته‌وه‌ سه‌ره‌ڕای كۆنگره‌و كۆنفرانسه‌كان له‌ سه‌ر ئاستى جیهان , قه‌یرانى دارایى و ئابوریش ته‌نگیان به‌ مرۆڤ هه‌ڵچنیوه‌و كێشه‌ى ئاواره‌و په‌ناهه‌نده‌كان له‌ كۆرۆنا سامناكتره‌ .
عێراق و هه‌رێمى كوردستان 
عێراقیش به‌ هه‌رێمه‌وه‌ بێ به‌ش نه‌بوو له‌و هه‌موو قه‌یران و كێشانه‌ كه‌ به‌رۆكى جیهانى گرتبوو له‌ ساڵى 2020 ، بۆیه‌ دۆخى ئابوورى وڵات له‌ لێوارى داڕماندایه‌ به‌ گوێره‌ى ڕاپۆرته‌ جیهانى  و ناوخۆییه‌كانیش ،  كار گه‌یشته‌ ئه‌وه‌ى مووچه‌ى كارمه‌ندانى ده‌وڵه‌ت به‌ قه‌رز دابین بكرێت له‌ چه‌ند مانگى ڕابردوو دا و كه‌مكردنه‌وه‌ى نرخ و به‌هاى دینارى عێراقى له‌ ده‌ستپێكى ساڵى  نوێدا كه‌ ئه‌مه‌ش ئه‌ركى سه‌رشانى خه‌ڵكى زیاتر قورس كرد ، هه‌موو ئه‌مانه‌ وایانكرد كه‌ وه‌زاره‌تى پلاندانانى عێراق  ئه‌و ڕابگه‌یه‌نێت  به‌ گوێره‌ى توێژینه‌وه‌یه‌ك به‌هاوكارى  بانكى نێوده‌وڵه‌تى  و ڕێكخراوى یونسێف  ئه‌نجامیانداوه‌    ( 2.700 )
دووملیۆن و حه‌وتسه‌دهه‌زار كه‌س له‌ ژێر هێڵى هه‌ژارییه‌وه‌ن به‌ شێوه‌یه‌ك كه‌ پێشتر 6 ملیۆن كه‌س هه‌ژاربوون به‌ڵام ئێستا 9.600 نۆ ملیۆن و شه‌شسه‌د هه‌زار كه‌س واته‌ 31% خه‌ڵكى وڵات .
هیواو ئاوات
ئه‌وه‌ى هیواو ئاواتى گه‌لى عێراقه‌ به‌ هه‌رێمى كوردستانیشه‌وه‌ له‌ ساڵى 2021  هه‌ڵبژاردنى پێشوه‌خته‌ ئه‌نجامبدرێت و كۆتایى به‌ گه‌نده‌ڵى و حوكمى میلیشیات و ئاژاوه‌و تیرۆرو خراپ به‌كارهێنانى ده‌سته‌ڵات وسنورداركردنى چه‌ك ته‌نها به‌ ده‌ست ده‌وڵه‌ته‌وه‌ .
دۆخى عێراق ئێستا  له‌ دواى ساڵى 2003 ه‌وه‌  هه‌رگیز له‌مه‌ خراپترو ئاڵۆزتر نه‌بووه‌ هه‌ر له‌ په‌یوه‌ندییه‌كانى نێوانه‌ هه‌رێم و ناوه‌نده‌وه‌ تاوه‌كو پرسى جێبه‌جێكردنى ده‌ستوورو و په‌یوه‌ندى نێوان پێكهاته‌ن و په‌یوه‌ندى ناوخۆیى پێكهاته‌كانیش له‌ بارێكى نه‌سازاو و شپرزه‌دایه‌ .
سه‌ره‌ڕاى هه‌موو ئه‌مانه‌ش هێشتا ئومێد زۆره‌ بزاڤێكى  مه‌ده‌نى ئه‌كتیف له‌ عێراق سه‌ریهه‌ڵداوه‌ كه‌ سنوورى ئتنیك و مه‌زهه‌بى تێپه‌ڕاندووه‌و خوازیارى دادپه‌روه‌رى كۆمه‌ڵایه‌تى و سه‌روه‌رى یاسایه‌  سه‌ره‌ڕاى هه‌موو به‌ربه‌ست و ئاله‌نگارییه‌كان .
‌‌ زیاتر ...
بورهان شێخ ڕه‌ئوف
سه‌رتیپ جه‌وهه‌ر‌
بورهان شێخ ڕه‌ئوف
كاروان یاروەیس
ژیروان دەرگەڵەیی
پارێزه‌ر نسار مسته‌فا
زۆرترین خوێندراو
  • 24 کاتژمێر
  • هەفتە
  • مانگ