بیروڕا
(کۆمەڵە) چی بوو؟
نیاز سەعید عەلی
 
 کۆمەڵە هەر بە تەنها ڕێبازێکی ئایدیۆلۆژیی نوێ و ڕێکخراوێکی سیاسیی تازە و هێزێکی شۆڕشگێڕی چەکداری دوای هەرەس نەبوو ، کۆمەڵە هەژانی تاڤگەیەکی ژانگرتووی پایزێکی وەیشوومە و شەختە زستانی شاخێکی سەختی پڕ لەهەوراز بوو ؛ بۆ بووژانەوەی ڕووبارێکی نوێی سازگار و پاک . 
سەرهەڵدانەکەی ڕووداوێکی گەورەی ڕچەشکێن بوو ، وێستگەیەکی گرنگی وەرچەرخان و ئاراستەیەکی بەهێزی مۆدێرنە و مەشخەڵێک بوو ؛ بۆ درەوشانەوەی بیری نوێی پێشکەوتنخوازیی  !
 ئاراستەی کارکردنی کۆمەڵە ؛ ڕێنیسانسێکی سیاسیی و ئایدیۆلۆژیی بوو ، بۆ نوێبوونەوەی تێزی ئایدیۆلۆژیی و داهێنانی ڕێبازی تازەی شۆڕشگێڕیی و مۆدێلی کاری سیاسیی هاوچەرخ !
کۆمەڵە؛ هێزی هیوا و جیهانبینی وەرچەرخان و گۆڕانی ڕادیکاڵیی بوو ،   
هێزی تۆمارکردنی مێژوویەکی  تازەی جیاوازتر بوو ، هێزی چین و توێژی نوێی پەراوێزخراوی ناو کۆمەڵگە بوو . 
زەنگی ڕاچڵەکینی نەوەی نوێ و وەرچەرخانی ڕەوشی کۆمەڵایەتیی باو بوو،  ئامرازی بەرەنگاربوونەوەی هەژموون و باڵادەستیی ؛ چین و توێژە کۆمەڵایەتیی و سیاسییە کلاسیک و کۆنەپارێز و تەقلیدییە سازشکارەکان بوو !
کۆمەڵە هێزی فریادڕەس و هێزی ئامادەی دوای شکست و هەستانەوە بوو . 
کۆمەڵە ساڕێژ و دەوای ناخی زامدار و سۆتماکی دوای هەرەس بوو ، هێزی بزواندنی ورەی نەپساوە و ئیرادەی تۆکمەی یاخییبوونی ڕەوا بوو ، هێزی توانەوەی بەستەڵەکی نائومێدیی و ڕەواندنەوەی ڕەشبینییەکی ترسناک بوو !
کۆمەڵە خوێندنگە بوو ؛ بۆ بنیاتنانی ئیرادە و تین و وانە و ئەزموون و وزەی نوێ ، کێڵگەیەکی فێرکاریی بوو ؛ بۆ مووتووربە و بەئەزموونکردنی ئامراز و ڕێباز و نەریتی نوێ .
سەرگووزشتە و حیکایەتەکانی کۆمەڵە ؛ یاداشت و تۆماری مێژوویەکی تازەی ناوازە بوو ، لەقۆناغێکی پڕ لەسیمبولی بەهای مرۆیی و مەعنەویی ؛ سیخناخ لەداهێنان و جوانیی و سەرکێشیی ڕەوا !
کۆمەڵە سیمفۆنیایەکی تووڕەی ناو زریانی پایزێکی نیشتمانی بێ ناز و بێ ناوونیشانی ناو ئۆقیانووسێکی خوێنی ڕژاوی بەفیڕۆچووی شۆڕشی ئەیلول بوو ؛ بۆ جۆشدان و خرۆشان ، تیایدا سروودەکانی ؛ (ئەنتەرناسیۆنال) و (هۆ کاکی پێشمەرگە) و (مەشخەڵان) و (ڕێی خەبات) و (ئاسوودە بن)ی لەگوێکاندا ئەزرنگانەوە ، هەمان ئەو سروودانە ، وەکو کەڕەنای ؛ ئەچوون بە گوێی دوژمناندا ، کاسی ئەکردن و ئۆقرەی ئارامیی لێ ئەبڕین !
کۆمەڵە تەلاری ئەو دیوارە ئارامبەخشانەی شەوانەی شار بوو ؛ کە پەیام و پۆستەری شەهید و دروشمە تۆقێنەرەکانی پیا هەڵئەواسرا و پێ ئەڕازێنرایەوە . 
 زێد و لانکەی کۆمەڵە ؛ گۆڕستانێکی پان و بەرینی بێ پەرژین بوو ؛ تیایدا کۆمەڵە لەگەڵ هەموو ژیانبەخشە سیمبوڵیی و کەم ژیانیی و کەڵ ژیانییەکان؛ ئامێزانی یەکتر بوو بوون ، ئەدەبیاتەکەی کۆمەڵەش ؛ دیوانە شیعرێک بوو ؛ بۆ کۆکردنەوەی شیعرەکانی (شێرکۆ) و (مەلاعەلی) و (جەمیل ڕەنجبەر) و بە کۆڵی ڕێبوارانی کاروانەکەوە بوو !
هەموو ئەمانەش لەلای کۆمەڵە ؛ لەسۆنگەی بنەمای جیاوازتر ، لەوانی تر بەرجەستە ئەبوو ؛ ئەو جیاوازییانەی ئیرادە و هیوا ، دروستی کرد و قۆناغ وای خواست ، هەرە جیاوازیی گرنگیش ؛ بریتیی بوو لەسەلماندنی مەرگدۆستیی بەکردار ، لەپێناو ژیاندۆستیی بۆ ئەوانی تر !
بەڵام ئەفسووس کۆمەڵە لەدوا هەناسەیدا ؛ بووە قۆچی قووربانیی و زەمەن وەرچەرخا ؛ بەرەو قۆناغی ڕەفتاری دوور لەناوەرۆک و خەسڵەت و ئاکار و پەیامەکانی پێشووی کۆمەڵە ، ئەویش قۆناغی داماڵینی دەمامکی شاراوەی بەشێک لە بەناو فیگەر و کارەکتەرە دیارەکان ؛ ئەوانەی نمایشکار و خاوەن پەیامی ڕازاوە و قسەی زل و بریقەدار بوون ، فوو لەخۆتێکەر و بەزۆر خۆ بەسیمبولکەر و خۆ بەقارەمانکەر بوون ، بەسەر خوێنی ڕژاوی تەڕی سەر خاک  و جەستەی شەقار و گۆڕی شەهیدی کێل شکێندراو و  دار و پەردووی سووتماک و داڕووخاوی نیشتماندا، بێ سڵەمینەوە بەرەو هێنانەدی حەز و ئارەزووە تێرنەبووەکان و  دەستەبەرکردنی ویست و دامرکانەوەی غەریزە ئاژەڵئاساییەکانیان هەنگاویان ئەنا ، ئەو  هەنگاوانەی کە بووە هۆی، هەڵدانەوەی دەمامک و دەرکەوتنی ڕووی ڕاستەقینەی دزێوی فرە مۆڕاڵیی و لوتکەی خۆپەرستیی و نغرۆبوون لەنێرجسییەتدا و پیشاندانی ناخ و دەروونی ڕەش و بۆش و خاڵییان؛ لەبەهای مرۆیی و ئایدیۆلۆژیی و  بێ مۆڕاڵیی و بێ ویژدانیی!.
‌‌ زیاتر ...
ئازاد ئیبراهیم ئەحمەد
نیاز سەعید عەلی
تەحسین تەها چۆمانی
ئازاد ئیبراهیم ئەحمەد
نه‌سرین كورده‌
ئازاد ئیبراهیم ئەحمەد
ئازاد ئیبراهیم ئەحمەد
ئازاد ئیبراهیم ئەحمەد
زۆرترین خوێندراو
  • 24 کاتژمێر
  • هەفتە
  • مانگ