بیروڕا
مرۆڤایه‌تی‌ سه‌رله‌نوێ ده‌بووژێته‌وه‌
ئارام عه‌لی
خۆپیشاندانه‌ جه‌ماوه‌ریه‌كانی‌ عیراق، لوبنان، جه‌زائیر و سودان و چیلی و چه‌ندین ده‌وڵه‌تی‌ دیكه‌ی‌ ئه‌وروپایی ده‌یسه‌لمێنن، كه‌ ئه‌و خۆپیشاندانانه‌ سه‌رهه‌ڵدان و به‌هاری‌ ئینسانن. داواكاریی و دروشمی‌ خۆپیشانده‌رانیش وه‌كو یه‌كن، كه‌ خۆی‌ ده‌بینێته‌وه‌ له‌ كۆتایی هێنان به‌ نادادپه‌روه‌ریی و راماڵینی‌ گه‌نده‌ڵكاران.
ئه‌م به‌هاره‌ له‌ خۆرهه‌ڵاتی‌ ناوه‌ڕاست هه‌ڵقوڵا، هه‌نگاو به‌ هه‌نگاو گه‌وره‌و فراوان بوو، هه‌ڵه‌ نیه‌ ئه‌گه‌ر پڕۆسه‌كه‌ به‌ مه‌نجه‌لێك بشوبهێنین ، كه‌ له‌ بنه‌وه‌ بڵق ده‌دات و ده‌كوڵێت تا ده‌گاته‌ سه‌ره‌وه‌. بنه‌وه‌ی‌ سه‌رهه‌ڵدانه‌كه‌ له‌ تونس و میسر ده‌ستیپێكرد و گه‌یشته‌ لیبیاو یه‌مه‌ن و سوریا، قۆناغی دووه‌می‌ به‌هاره‌كه‌ گه‌یشته‌ فه‌ره‌نسا و ئه‌وروپا و بوه‌ به‌هاری فه‌ره‌نسایی، قۆناغی سێیه‌م گه‌یشته‌ سودان و جه‌زائیر و باكوری‌ ئه‌فریقیا و بوه‌ به‌هاری‌ ئه‌فریقایی، ئه‌مڕۆیش گه‌یشته‌ عیراق و لوبنان و بوو به‌ جیهانیی. داواكاری ته‌واوی‌ خۆپیشانده‌رانیش هێنانه‌ كایه‌ی‌ دادپه‌روه‌ریه‌، له‌ناوه‌ڕۆكی خۆیدا گه‌ڕاندنه‌وه‌ی‌ شكۆمه‌ندیه‌ بۆ ئینسان. ناسنامه‌ی‌ ئینسان بوون تیایدا زاڵه‌ به‌سه‌ر هه‌موو ناسنامه‌ ناڕه‌سه‌نه‌كان.
گه‌نده‌ڵكار و كه‌ره‌سته‌كانی‌ سیسته‌می‌ سته‌مكاریی ، ئینجا چ حكومه‌ت بێت یان په‌رله‌مان، چ حزب بێت یان دیكتاتۆره‌كان به‌م سه‌رهه‌ڵدانانه‌ هه‌ڵده‌وه‌شێنرێنه‌وه‌و ده‌نیشێنرێن و دواتر فڕێده‌درێنه‌ده‌ره‌وه‌، له‌ جێگای‌ ئه‌وانیش سیسته‌می‌ دادپه‌ره‌وه‌ریی تازه‌ داده‌مه‌زرێنرێت.
به‌و واتایه‌ ئه‌م پرۆسه‌ی به‌هاره‌ گێژه‌نێكی‌ مێژووكرده‌، به‌ شه‌پۆله‌كانی‌ كۆن قووتده‌دات و له‌ هه‌ناوی‌ خۆیدا نوێ دێنێته‌كایه‌وه‌. كۆن هه‌ڵده‌وه‌شێنێت و له‌ گه‌رمه‌ی‌ جه‌نگ و ململانێشیدا له‌ گه‌ڵ ئه‌م كۆنه‌، پێداویستیه‌كانی‌ سیسته‌می‌ نوێ وه‌كو پرۆسه‌یه‌كی دیالێكتیكی‌ بابه‌تیانه‌ فه‌راهه‌م ده‌كات. به‌و مانایه‌ی‌ پرۆسه‌ی‌ رووخاندن و بنیاتنانه‌وه‌ی‌ له‌ یه‌ك كاتدایه‌. به‌ هه‌موو ماناكانی‌ وشه‌ شۆڕشه‌. شۆڕشێك كه‌ سیسته‌می‌ جیهانیی كۆتایی پێدێنێت و فڕیی ده‌داته‌ ناو زبڵدانی مێژوو.
ئه‌م به‌هاره‌، سایكس پیكۆ و سیسته‌مه‌ دیكتاتۆریه‌كانی‌ خۆرهه‌ڵاتی‌ ناوه‌راستی‌ له‌ناوبرد، زه‌مینه‌ی‌ بیروبۆچوون و ناسنامه‌ ناڕه‌سه‌نه‌ ره‌گه‌زپه‌رسته‌كانی‌ به‌ هه‌موو جۆره‌كانیه‌وه‌ نه‌هێشت، ئاسۆیه‌كی فراوانی‌ ئینسانبوون و هاووڵاتیبوونی كرده‌وه‌، كه‌ له‌ ژێر سایه‌ی‌ ده‌وڵه‌تی‌ قانوندا، ناوكی‌ ئایدۆلۆجیی یه‌كه‌ی‌ نوێی سیسته‌می‌ جیهانی پێكده‌هێنێت.
له‌و روه‌وه‌ ئه‌و رووداوو گۆڕانكاریانه‌، ئه‌و به‌هار و سه‌رهه‌ڵدانانه‌ له‌ كه‌سایه‌تی‌ نه‌خشه‌ی‌ خاكی‌ پیرۆزی‌ نێوان فورات و نیلدا، كه‌ لانكه‌ی‌ شارستانیه‌ت و سه‌ره‌تای‌ ده‌ستپێكردنی‌ مێژووه‌، وه‌رده‌چه‌رخێن بۆ بووژانه‌وه‌ی‌ شارستانیی و، دواجار كۆتایی به‌ ته‌واوی‌ سیسته‌میی سته‌مكاریی جیهانی دێنێت، كه‌ له‌ رووداوه‌كانی‌ رۆژگاری‌ ئه‌مڕۆماندا ئاوابوونی‌ خۆره‌كه‌ی‌ ده‌بینین. به‌مه‌یش نه‌ته‌وه‌یه‌كگرتوه‌كان و ئه‌نجومه‌نی‌ ئاسایش هه‌ڵده‌وه‌شێنه‌وه‌، سیسته‌می‌ نوێ له‌ جێگه‌ی‌ ئه‌وان دێته‌كایه‌وه‌، به‌مه‌یش شكۆمه‌ندی بۆ ئینسان ده‌گه‌ڕێنرێته‌وه‌و سیسته‌مێكی دادپه‌روه‌ر داده‌مه‌زرێنرێت.

‌‌ زیاتر ...
شه‌هریه‌ احمد
ئاری عومه‌ر
ئازاد ئیبراهیم ئەحمەد
زۆرترین خوێندراو
  • 24 کاتژمێر
  • هەفتە
  • مانگ