دۆسیە
یه‌كێتی تاچەندبڕوای بە مافی چارەی خۆنووسین هەبووه‌؟
دیداری:عه‌بدول نه‌جم

له‌یادی 42 دامه‌زراندنی یه‌كێتیی نیشتمانی كوردستاندا، (ئه‌نوه‌رساڵه‌ح عه‌زیز)لێپرسراوی به‌شی ڕاگه‌یاندن وڕووناكبیری مه‌ڵبه‌ندی یه‌كی ڕێكخستنی سلێمانی یه‌كێتی وێڕای پیرۆزبایی، كە 38 ساڵ تەمەنی خۆی بۆیه‌كێتی نیشتمانی تەرخان كردووە ،ڕاشكاوانه‌ وه‌ڵامی پرسیاره‌كانی ئاڕاسته‌ ده‌داته‌وه‌ و باس له‌ و گۆڕانكاریانه‌ ده‌كات كه‌ داواو مافی گه‌نجانی یه‌كێتیه‌.

ئاڕاسته‌: پەیامی بەڕێزتان چییە بۆ یادی 42 ساڵەی ( ی.ن.ك)
دەمەوێت لەم یادەدا سەری رێزوو نەوازش بۆ شەهیدانی یەكێتی نیشتمانی كوردستان و سەرجەم شەهیدانی رێگای رزگاری كوردستان دادەنەوێنم ،وە دەمەوێت لێرەوە سڵاوێكی گەرم ئاڕاستەی بەڕێزم جەنابی مام جەلال سكرتێری گشتی دەكەم .. وە سڵاو بۆ كەس و كاری سەربەرزی شەهیدان و سلاو ئەمەك بۆ هێزی پێشمەگەی كوردستان كە بەردەوام پارێزەری كوردو كوردستان بوون . وە لەم یادەدا پیرۆزبایی لە هەموو هەڤاڵانم و هەموو یەكێتیەكان بكەم بە هیوای ئەوەی كە ئەرك و ماندوو بوون و خەبات و تێكۆشان و خوێن ڕشتنی سەرجەم هەڤاڵانمان ببێتە مایەی گەشە پێدانی ( ی.ن.ك) و سەركەوتنی بیرو باوەڕەكانی ( ی.ن.ك)

ئاڕاسته‌:ئێوە لەم یادەدا كە یادی 42 ساڵه‌یداچۆن بارودۆخی ( ی.ن.ك) هەڵدەسەنگێنن ؟
بۆ ئەم پرسیارە دەمەوێت زۆر بەڕاشكاوی وەڵامتان بدەمەوە وەكوڕایەكی كادرێكی ( ی.ن.ك) كە 38 ساڵ تەمەنم بۆ تەرخان كردووە بارودۆخی ( ی.ن.ك) بارودۆخێكە كە جێگەی رامان و پرسیاری جدی هەموو كادرێكە ،حیزبەكەمان لە جێگەی ئاوات و خواستی ئێمەدا نییە ، بە بارو دۆخێكی خراپدا گوزەر دەكات بۆیە ناكرێت ئێمە هەر بە پۆزەتیف قسەو وتار بدەین دەبێت ئیتر كادرەكان بە جورئەتەوە بیربكەنەوە بۆچی ؟ یەكێتین ،بۆچی یەكێتی وایە ؟ وە چۆن دەكرێت چاكی بكەین ؟ چی دەكرێت بۆ چاككردنی ئەم حیزبە ؟ بۆیە دوای نەخۆش كەوتنی جەنابی مام جەلال كەلێنی گەورە كەوتۆتە ناو مەكتەبی سیاسی و سەركردایەتی ( ی.ن.ك) كە ئەمەش وای كردووە نەتوانرێت ( ی.ن.ك) بە شێوەیەكی زانستیانە ئیدارەی ژیانی حیزبایەتی خۆی بدات وە لە هەمان كاتدا ئەمە وای كردووە لە ستراتیجی سیاسیدا بی پلان وئەجێندای سیاسی كاربكات .
له‌كاری حكومەتدا (ی.ن.ك) وەك هێزێكی پەراوێز مامەڵەی لەگەڵداكراوه‌، وەلەسەر ئاستی جەماوەریشدا كاریگەریمان لەسەر كۆمەڵانی خەڵكی كوردستاندا لاواز بووە ، بۆیە لەبەر ئەم هۆكارانەی سەرەوە ناكرێت ئیتر كادرە بنەڕەتیەكانی ( ی.ن.ك) بێ‌ دەنگ و پاشكۆ سەیر بكات ،ناكرێت هەر بڵێین چی یە ئێمە دەكرێت بۆیە دەبێت هەموومان واتە یەكێتیەكان بە رۆحێكی هەڵسانەوەو ڕەخنە لەخۆ گرتن و خۆسازدان و چاكسازیی و بەستنی كۆنگرەو لەسەر نوێ‌ ( ی.ن.ك) بخەینەوە ئەو ئاستەی كە بتوانێت گۆڕانكاری لە خۆیدا بكات هەم بتوانێت رابەرایەتی گۆڕانكاریەكانیش بكات ، بەم رێگەیەش دەتوانێت درێژە بە خەباتی ( ی.ن.ك) بدەین ..



ئاڕاسته‌:بەڕای ئێوە یەكێتی لە مێژووی خۆیدا تا چەند بڕوای بە مافی چارەی خۆنووسین هەبووه‌؟ 
بارودۆخی خراپی ( ی.ن.ك) وای كردووە كە بیرو باوەڕو بنچینەكانی وەك خەباتی نیشتمانی – دیموكراسی و ئازادی و یەكسانی و دادپەروەری و سەروەری یاسا دوور بكەوێتەوە لەسەر دەمی خەباتی شاخەوە چمكی ئۆتۆنۆمیمان گۆڕی بۆ مافی چارەی خۆنووسین . واتە ( ی.ن.ك) لە مێژە بڕوای بە مافی چارەی خۆنووسین هەبووە ، بە درووست بوونی دەوڵەتی كوردییەوە وە هیچ كاتێكیش لەم ئەركە یان لەم بیرو باوەڕە دوا نەكوتووە و خەباتی بۆ كردووە بەپێی مێژووی قۆناغەكانی خەباتی یەكێتی نیشتمانی كوردستان، بۆیە لە هەندێك كات و هەل و مەرجی مێژوییدا رێگەیان لەم بیرو باوەڕی  ( ی.ن.ك) دەگرت وبە تەتەروف باسیان دەكرد ،ئەوە یەكێتی نیشتمانی بووە زۆر بە جورئەتەوە كاری سیاسی و دبلوماسی و میدیای بە راشكاوی بكات بۆئه‌م بابه‌ته‌،بەرگری لەم بنەمایە كردووە بە مافێكی سەره‌تایی خەڵكی كوردستانی زانیوە .. تا هەڵبژاردنەكانی پەرلەمانی كوردستانی ساڵی 1992 هەندێك حیزب بۆ بانگەشەی هەڵبژاردن ئۆتۆنۆمییان لەسەر لافیتەكانیان نووسی بوو داوای ئامانجی ئۆتۆنۆمبیان ده‌كرد، وە پاشان لە پەرلەمانی كوردستان بەرگرییان لە ئاڵای عێراق دەكردو لە 31 ی ئابشدا جەیشی داگیركاری عێراقیان هێنایە سەر دڵی نیشتمان و پەرلەمانی كوردستانیان داگیركرد بۆیە هیچ حیزبێك ناتوانێت موزایەدە بكات لەسەر درووست بوونی دەوڵەتی كوردیی و راپرسی گشتی  چونكه‌ ئەوە ئامانجی سیاسی یەكێتی نیشتمانی  كوردستان بووە و خەباتی سەرسەختی بۆ كردووە ، بەڵام بەداخەوە بەهۆی ئەوەی ئۆرگانەكانی ( ی.ن.ك) وەك پێویست نەیانتوانیوە تەوزیفی ئەم ئامانجە بكەن بۆیە هێزو لایەنی ترخۆی كردووە بە میراتگری .



ئاڕاسته‌:كادرانی یەكێتی بە تایبەتی گەنجان داوای گۆڕانكاری دەكەن دەبێت یەكێتی چ گۆڕانكاریەك بكات ؟
ئەم پرسیارە پەیوەندی بە پرسیاری یەكەمەوە هەیە ، یەكێتی نیشتمانی كوردستان تەمەنی خەباتی گەیشتۆتە 42 ساڵ ئەگەر گەنجەكانی ئەو سەردەمە قیادەی ئەم بزووتنەوەیەیان كردبێت تەمەنیان لە 20 ساڵیشدا بووبن ئێستا تەمەنیان بۆتە 62 ساڵ ئەمە خاڵێكە كە بەداخەوە زۆرێك لە رابەرایەتی ( ی.ن.ك)لە ساڵەكانی 76 وە تا ئێستا لێپرسراون لەناو یەكێتیدا بۆیە بە هەر شێوەیەك بێت سەركردایەتی ئەم حیزبە موتوربە نەكراوە بەئەقڵی مرۆڤی گەنج و سەردەمیانە ، بۆیە ئێستا ئەم حیزبەی ئێمە پێویستی بە نوێگەری و گۆڕانی گەورە هەیە و نەتوانراوە خوێنی نوێ‌ بە مەعریفەو زانستی سەردەم  ومەدەنیانە ئامادە بكرێت بۆ كایەكانی حیزبایەتی بۆیە ئۆرگانەكانی ( ی.ن.ك)تا ئێستا بە شێوەیەكی كلاسیكی و ئەقڵیەتی شاخ و ناوچەگەریی و لەسەر بنەمای تەكەتول  رێكخراوە ... وە لە هەندێك شوێندا بەرژەوەندیەكان رۆڵ دەبینێت و هێزی بەرژەوەندی بۆتە جێگرەوەی هێزی سیاسی و مەعریفی و جەماوەری وە لە هەمانكاتدا یەكێتی نەیتوانیوە بە شێوەی ئاسایی خۆی كۆنگرەو كۆبونەوەكانی خۆی ئەنجام بدات بۆ ئەم جیلە لە حكومڕانی ( ی.ن.ك)  رێگەی نەداوە گۆڕانكاریەكان بكرێت بە كەسی گەنج و خەلكی تری بە توانا  كه‌ به‌دووربن له‌ لۆجیكی هێزو لۆجیكی عه‌قڵ و یاسا بكه‌نه‌ بنه‌مای كاری حیزبایێ و سیاسیته‌ كردن،ئه‌م كاره‌ش له‌ سه‌ر پرنسیپی پەیڕەو پرۆگرامی حیزبەكەو هەر چوار ساڵ جاریك گۆڕانكاری چۆنایەتی و جه‌ندایه‌تی  بكرێت بەم پرۆسەیەش دەتوانرێت گەنج و خەلكی نوێ‌ بێتە پێشەوە ،بۆ گەنجان مافی خۆیانە رەخنە بگرن لەسەر ئەم میكانیزمی گۆڕانكاریانه‌و ئەم قۆرخكاریەی دەسەڵاتی حیزبی كوردی .

1847 جار خوێندراوه‌ته‌وه‌
6/1/2017 12:16:44 PM
زیاتر ...