دۆسیە
شۆفێرانی قەزای شارەزورئامادە نین لەتێرمیناڵی شارەزوركاربكەن؟
ڕاپۆرتی: ئیمان زەندی

پڕۆژەی تێرمیناڵی قەزای شارەزور كە لەسەر بودجەی پەرەپێدانی پارێزگاكان بودجەی بۆ تەرخانكراوە، زیاتر لەساڵێكە كارەكانی تەواو بوە، بەڵام تائێستا نەكەوتوەتە كار.

ئەم پڕۆژەیە لەقەزای شارەزور لەسەر بودجەی پەرەپێدانی پارێزگاكان بڕی 2 ملیارو 490 ملیۆن و 379 هەزارو 475 دیناری بۆ تەرخانكراوە، هەروەها پڕۆژەكە لەوادەی یاسای خۆیدا كە 365 ڕۆژی بۆ دیاری كرابو تەواو بوە، لەئێستاشدا زیاتر لەساڵێك بەسەر تەواوبونی ئەم پڕۆژەیەدا تێپەر دەبێت، بەڵام شۆفێرانی هێڵەكانی گواستنەوەی قەزاكە ئامادە نین كارەكانیان بگوازنەوە بۆ ئەوێ‌، لەكاتێكدا هاوڵاتیانیش بێزاربون لەبیستنی تەواوبونی كارەكانی پڕۆژەكەو دەڵێن نازانین بۆچی وەستاون و ناكرێتە زیادكردنی ئاشكراوە.

دەرگای ته‌رمیناڵه‌كه‌ لەتەنیشت نەخۆشخانەكەدایه‌
لەوبارەیەوە شۆفێری یەكێك لەهێڵەكانی گواستنەوەی قەزاكە لەلێدوانێكیدا بۆ ئاڕاستە ئاشكرایكرد: سەرەتا ئەو تێرمیناڵەیان كردۆتەوە شوێنەكەی زۆر خراپە، لەگەڵ ئەوەشدا نزیكە لەنەخۆشخانەی گشتی شارەزورەو دەرگاكەی لەتەنیشتی نەخۆشخانەكەیە واتە نوساوە پێوەیەوە.
ئەو شۆفێرە ئاماژە بەوەشدەكات كە ئێمەی شۆفێر هیچ كاتێك لەو شوێنە ڕازی نین، : چونكە شوێنەكەی باش نیەو گونجاو نیە بۆ ئێمەی شۆفێران، دەرگای تێرمیناڵەكە كەوتوەتە ناو كۆڵانێكەوە زۆر قەرەباڵغ و بێكەڵكە.هەروەها تێرمیناڵەكە دەدەن بەكرێ، پارەكەی زۆرە كە حكومەت داوای دەكات ئەوەندە زۆرە كەس ناتوانێت خۆی لەقەرەی بدات.  
ئەو شۆفێرە دڵگرانە بەوەی كە نە یاسا لێیان دەپرسێتەوە نە بەشی گواستنەوەو نە سەندیكا نازانن هانا بۆ چ لایەنێك بەرن، ئەو وتی: لەگەڵ ئەوەشدا تەكسی تایبەت كاری ئێمەی زۆر كەمكردوەتەوە، بەڕاستی نازانین چی بكەین ئەمە دۆخ نیە ئێمەی تێدایە لەكاتێدا موچە خۆریش نین جگە ژمارەیەكی كەمان نەبێت.

لەئێستاشدا ئەو تێرمیناڵە لەژێر چاودێری شارەوانی شارەزورە
ڕزگار غەفور، قائیمقامی قەزای شارەزور لەوبارەیەوە ئاشكرای كرد: پڕۆژەی تێرمیناڵی قەزای شارەزور لەسەر بودجەی پەرەپێدانی پارێزگاکان بڕی 2 ملیارو 490 ملیۆن و 379 ھەزارو 475 دیناری بۆ تەرخانکراوەو پڕۆژەکە لەماوەی یاسایی خۆیدا کە ٣٦٥ ڕۆژی بۆ دیاری کرابوو زیاتر لە ساڵێکە كارەكانی تەواو بوە ھاوڵاتیان و چالاکوانانی مەدەنی قەزاکەش داوا دەکەن ئەو پڕۆژەیە بۆ خزمەتکردنی ھاوڵاتیان بەکاربھێنرێت.
قائیمقام ڕایشیدەگەیەنێت: نوسراویان بەرزکردۆتەوەو چاوەڕوانی وەڵامی بەڕێوەبەرایەتی گشتی شارەوانیەكانی سلێمانیە بۆ ئەوەی بەشێوەی زیادكردنی ئاشكرا بەكرێی بدەن، لەئێستاشدا تێیرمیناڵەكە لەژێر چاودێری شارەوانی شارەزوردایە، ئەم تێرمیناڵە لەسەر ڕوبەری 17 هەزارو 605 مەتر دوجا دروستكراوەو مزگەوت و ئوتێلو كافتریاو سەرجەم خزمەتگوزارییەکانی بۆ دابین کراوە.

نەكردنەوەی ئەم تێرمیناڵە نیگەرانی هاوڵاتیانی لێكەوتوەتەوە
 ژنێك كە نەیویست ناوی بڵاوبكرێتەوەو دەڵێت نازانین بۆچی تائێستا ئەم تێرمیناڵە بەڕوماندا نەكراوەتەوە؟ لەكاتێكدا زۆریش پێویستمانە، ئەو وتی: ئەوە بۆ نزیكەی دو ساڵە تەواو كراوە هێشتا بەڕوی ئێمەی هاوڵاتی نەكراوەتەوە، نازانم تائێستا هیچ سودیمان لێ نەبینیوە، تەواو كراوەو  بۆ ناكرێتەوە.
ڕاشیگەیاند: لەهەمانكاتدا من ژنم ماڵم لەتێرمیناڵەكەوە نزیكە بەڵام ئەو هێڵەی تر چارەكێك ماڵمان لێی دورە، مەرج نیە هەمیشە كەسێكم لەگەڵ بێت تا بمگەیەنێت، گەر بێتو درەنگ كەوم خەڵك هەڵە تێدەگەن نازانین چیبكەین، داواكارین لەلایەنە پەیوەندیدارەكان بەزوترین كات بەڕوماندا بیكەنەوە ئەمە حاڵ نیە هەمانە.

كردنەوەی ئەم تێرمیناڵە نەبوەتە گرفت بۆ ژنان، بەڵكو پیاوانیش گلەیو گازندەی خۆیانیان دەربڕیوە
جاسم ئەمین لەوبارەیەوە وتی: گلەیم لەشتیك هەیە كە ئەو تێرمیناڵەیە یەك دەرگای تێدایە گەر بەڕوماندا بشكرێتەوە ناكرێت هەمو لەدەرگایەكەوە ورژم بكاتە ژورەوە. هیوادارین بكرێتەوە گەر بكرێتەوە شتێكی زۆر باشەو ڕێگامان بۆ نزیك دەكاتەوە.

گرفتەكە نرخی ئیجارەكە نیە، بەڵكو شارەوانی دەیدات بەكرێ‌ بە بەڵێندەرێك
بەهادین ئیبراهیم فارس، بەڕێوەبەری شارەوانییەكانی سلێمانی بۆ ئاڕاستە ئاشكرای كرد: پێناچیت گرفتی سەرەكی تێرمیناڵەكە كرێكەی بێت واتە ئیجارەكەی، لێرەشدا شۆفێر تێرمیناڵەكە بەكرێ‌ ناگرێت، بەڵكو شارەوانی بەكرێی دەدات بەمەش كەسێك وەكو بەڵێندەریك بەكرێی دەگرێت پارە لەشۆفێران وەردەگرێت لەهەمو شوێنێك هەر بەوشێوەیە، باسیش لەوە دەكەن كە هیچ كەسێك بەكرێی ناگرێت چونكە شۆفێرەكان ناچنە ناو تێرمیناڵەكەوە پێشتر وامان پێ‌ وترا بو، بەڵام ئێستا خەمڵاندنی بۆ كراوە بەكرێی بدرێت لەئێستاشدا مەبلەغەكەم لەبیر نیە كە ئیجارەكەی چەندە بەهۆی سەرقاڵی كارویاری ڕۆژانەمەوه، لێرەدا ئێمە بۆ ئەو كارە لیژنەمان هەیە، لیژنە خەمڵاندنی بۆ دەكات هەر بۆیە ئێمە زۆر كەم دەستكاری ئەو خەمڵاندنانە دەكەین مەگەر سكاڵایەك هەبێت بەمەش چاو پیاخشاندنەوەی بۆ دەكەین وپرسیار لەسەرۆكی شارەوانی ئەو ناوچەیە دەكەین.

ئاماژەی بەوەشكرد: ڕاستە دەبێت موراعاتی خەڵك وشۆفێران بكەین لەم كاتی قەیرانەدا بەڵام ناشكرێت كرێكەی زۆركەم بێت، لەڕاستیشدا هیچ سكاڵایەكمان پێنەگەشتوە دەتوانن لەڕێگەی ماڵپەرەكەتانەوە سكاڵاكانیان بگەیەنن، یاخود بیدەن بەشارەوانی، گە رنەشیانەویت بیگەیەنن بەشارەوانی شارەزور شۆفێران دەتوانن ڕاستەوخۆ بیگەیەنن بەسەرۆكایەتی ئێمە ئێمەش كاره‌كانیان بۆجێبه‌جێده‌كه‌ین.

6161 جار خوێندراوه‌ته‌وه‌
5/28/2017 9:47:54 AM
زیاتر ...