دۆسیە
كاردانه‌وه‌كانی دوای ده‌ست له‌كاركێشانه‌وه‌ی سه‌ردار قادر
ڕاپۆرت :عه‌بدول نه‌جم

ڕۆژی 2ی ئایار له‌ كۆنگره‌یه‌كی رۆژنامه‌وانیدا سه‌ردار قادر له‌بری پارێزگاری سلێمانی ده‌ستله‌كاركێشانه‌وه‌ی خۆی له‌ پۆسته‌كه‌ی راگه‌یاند وتی له‌به‌ربێ‌ ده‌سه‌ڵاتی‌ پۆسته‌كه‌م و به‌ده‌مه‌وه‌ نه‌هاتنی‌ حكومه‌تی‌ هه‌رێم بۆ داخوازی‌ شه‌قام و پێداویستی‌ هاوڵاتیان و نه‌بوونی‌ پشتگیری‌ پێویست بۆ هه‌نگاو و هه‌وڵه‌كانمان ده‌ست له‌پۆسته‌كه‌م ده‌كێشمه‌وه‌ .
دوای ده‌ست له‌كاركێشانه‌وه‌كه‌ی سه‌ردار قادر كاردانه‌وه‌كان له‌لایه‌ن كه‌سانی حیزبی و ڕۆژنامه‌نوسان و نوسه‌رانه‌وه‌ زۆر بوون . 

حکومەتی خۆجێی و دەستلەکارکێشانەوەکەی ل.پارێزگار
ڕێكه‌وت زه‌كی ئه‌ندامی ئه‌نجومه‌نی پارێزگای سلێمانی له‌ فراكسیۆنی یه‌كیتی ده‌ڵێت: حکومەتی خۆجێی و دەستلەکارکێشانەوەکەی ل.پارێزگار،لە ھەڵوێستێکی چاوەڕوانکراودا و لەگەرمەی کۆبونەوەیەکدا لە ئـەنجومەنی پارێزگا  ڕۆژی 2ی ئایار سەردار قادر دەستی لەکارەکەی کێشایەوە، پوختەی ھۆکارەکەی نەبونی دەسەڵاتی پێویستی کارگێڕی و داراییە، بچوکی و پشتیوانی و کەمی کۆمەکە لەبەرامبەر تەحەدای قەیرانە زۆرەکاندا، گرفتی ئـاوی دوکان ، پەروەردە، کارەبا، ڕێگاوبان ، سەوزایی، تەجاوزات، تەندروستی، قەرزی بەڵێندەران، پۆلێک قەیرانی قەبەن.

ڕێكه‌وت زه‌كی ده‌شڵێت:لەڕاستیدا ئـێمە لەناوەڕاستی قەیراێکی بێ سەمەرداین بەبێ ئـەوەی تروسکایی ئـومێدمان لێدیاربێت، بەڕای بەندە ئـەم ھەڵوێستە پێویستی بەنرخاندنە، دەبێت ئـیستیسمار بکرێت بۆ فشاری گەورە لەپێناو دەسەڵاتی دارایی و کارگێڕی بۆ حکومەتە خۆجێیەکان، نەک وەک ڕاکردن تەماشا بکرێت.
ئه‌وئه‌وئه‌ندامی ئه‌نجومه‌نی پاریزگایه‌ ده‌شڵیت: وردتر بڵێم دەبو دەستلەکارکێشانەوەی کۆی حکومەتە خۆجێیەکەبێت نەک تەنیا سەری ھەرەمەکە، قبوڵنەکردنی لاوازی و بێدەسەڵاتی پێویستە بکرێتە مۆدێل بۆ ھەموو خاوەن کورسیەکان، ناکرێت حکومەتی خۆجێی قەرزاری دوکانداری ناوبازاڕبێت و ھێشتا بۆی پێبکەنین،مەگەر قەرارمان وایە ماڵمان پڕبێت لە ڕازیانەو بە دەردی سک ئـێشە بمرین.

ئەو بڕیارەیە كە ئەبوایە حكومەتی هەرێمی كوردستان بیدایە
خالید سلێمانی نوسه‌ریش ده‌ڵێت:ئەندامی ئەنجومەنی پارێزگا كاك ڕێكەوت لەسەرنجەكانیدا دەربارەی هۆكارەكانی دەست كێشانەوەكە ئەنوسێت : (نەبونی دەسەڵاتی پێویستی كارگێڕی و داراییە، بچوكی و پشتیوانی و كەمی كۆمەكە لەبەرامبەر تەحەدای قەیرانە زۆرەكاندا، گرفتی ئـاوی دوكان، پەروەردە، كارەبا، ڕێگاوبان، سەوزایی، تەجاوزات، تەندروستی، قەرزی بەڵێندەران، پۆلێك قەیرانی قەبەن)منیش ده‌ڵێم ، ئەو بڕیارەیە كە ئەبوایە حكومەتی هەرێمی كوردستان بیدایەو هۆكاری زۆر بەهێزتر لەهۆكارەكانی پارێزگای سلێمانی هەبون.
خالیدسلێمان ئاماژه‌ بۆئه‌وه‌شده‌كات،كوێربونی بونی هاووڵاتیان بەهۆی دەرزی و دەرمانی خراپەوە، دەست بڕینی مناڵێك بەهۆی سیستمێكی تەندروستی بێسەروبەر، پەككەوتنی خوێندنی ٢٠١٦-٢٠١٧ بۆ چەند مانگێك، بڕینی موچەی فەرمانبەران، نەبونی خزمەتگوزاری پێویست، داتەپینی ژێرخانی ئابوریی وڵات، توندوتیژی سیاسی بەهۆی بیروباوەڕی جیاوازەوە و هەزارو یەك هۆكاری تر،ئەمانە ئەگەر لەهەر وڵاتێكدا، تیایدا نزمترین ئیلتیزام بە پرانسیپەكانی حوكمڕانییەوە هەبێت، ڕوبدەن و هەبن، نەك تەنها حكومەتێك بەڵكو سیستمكی سیاسی دەگۆڕن.
ئه‌و نوسه‌ره‌ ده‌شڵیت،دیارە هێشتا لەكوردستاندا، حوكمڕانیی بەشێك نییە لەبەرپرسیارێتی و تەنها پڕكردنەوەی بۆشاییەكی یاساییە، ئەگینا چی ئەخلاقێكی سیاسی، ئەو هەموو نەهامەتی و ڕسواكردن و خراپەكارییەی پێ قبوڵە كە بەرامبەر هاهووڵاتیان پیادە دەكرێن؟

ده‌ست له‌كاركێشانه‌وه‌كه‌وەك پاشەكشێیەكی بەرچاوی سلێمانی تەماشا بكرێت. نەك تەنها وەك پارێزگایەك
خالید ده‌شڵێت،دور لەو لێكدانەوە سەرپێیانەی لەسەر دەست كێشانەوەكە دەكرێن، دەكرێ وەك پاشەكشێیەكی بەرچاوی سلێمانی تەماشا بكرێت. نەك تەنها وەك پارێزگایەك، بەڵكو وەك سەنتەری ڕوبەرێكی فراوانی جوگرافیای كۆمەڵایەتی و كولتوری، سیاسیش بە تەبیعەتی حاڵ كە گەرمیان و شارەزور و شارباژێر و بتوێن و زۆر شوێنی تر دەگرێتەوە. ئەو خاڵانەش كە كاك ڕێككەوت زەكی دەسنیشانی كردون بەسن بۆ ئەوەی ئەم جوگرافیا كۆمەڵا-كولتورییە توشی قەیرانێكی لەوە قورستر بێت كە تیایدا ئەژیت.
نوسه‌رئاماژه‌ به‌ بێباكی دەسەڵاتی هەرێمی كوردستان ده‌كات و ده‌ڵێت بوەتە قەڵایەكی خاوەن بەرژەوەندییەكان و هەوڵی پاراستنی لە توڕەبونی خەڵك دەدرێت، زیاتر و زیاتر بەم حاڵەی ڕازیەو باكی بە داتەپینی سەنتەرێكی گەورەی وەك سلێمانی نیە. وەك ئاستێكی بەرزی توڕەبون و ناڕەزایی، ئایا دەكرێ هاووڵاتیان دەست لە هاووڵاتیبونی خۆیان بكێشنەوە؟

وەزیرەكانی  گۆڕان لەماڵەوەن و جورئەتی دەستلەكاركێشانەوە ناكه‌ن
هه‌روه‌ها عه‌زیزڕه‌ئوفی نوسه‌ریش ده‌ڵێت: سەردار قادر دەستی لە پۆستی پارێزگار كێشایەوە. ئەمەش بۆ خودی سەردار شایەنی لەسەر وەستانە و دەكرێت وەك كردەیەكی شەخسی وێنا بكرێت كە كەسێك جورئەت بكات بڵێت دەسەڵاتم نیە و دەكشێمەوە.
عه‌زیزڕه‌ئوف ده‌لێت:بەڵام ئەمە لەسەر سیاسیەتی بزوتنەوەیەك هەژمار ناكرێت وەزیرەكانی لەماڵەوەن و جورئەتی دەستلەكاركێشانەوە ناكەن. كە وتمان بەشداری دەسەڵات مەككەن و مۆدێلێكی سیاسی نوێ بن، كۆیلەكان هێرشیان دەخستە سەرمان، كە ئێستا دەست لەكار دەكێشنەوە هەر ئەم جۆرە لە كۆیلەی حزبی دەستخۆشی لە سەردار دەكەن. 

پارلەمان پەكی كەوتووە كەس جورئەت ناكات دەست لەكار بكێشێتەوە
ئه‌و نوسه‌ره‌ ئاماژه‌ بۆئه‌وه‌ش ده‌كات:بەكورتی تێم بگەیەنە سیستەمی حوكمڕانی هەناسەی ئەوەی تیایە كاری تێدا بكەن یان نا؟ پارلەمان پەكی كەوتووە كەس جورئەت ناكات دەست لەكار بكێشێتەوە، كەچی دەستخۆشی لە سەردار دەكەن. من نازانم ئەم بزوتنەوەیە چی دەكات، بەڵام ئەوە دەزانم لە دەستلەكاركێشانەوەی پارێزگار و مانەوەی وەزیرە دەركراوەكان و پارلەمانتارە بێكارەكانی پێمان دەڵێت ئەم هێزە لە چ پاشاگەردانیەكی گەورەدا دەژی و لە چ بەتاڵیەكی فكری و لە چ دۆخێكدا دەژی كە نە توانای بڕیاردانی هەیە و نە دەزانێت بەڕاستی دەیەوێت چی بگۆڕێت.

1384 جار خوێندراوه‌ته‌وه‌
5/4/2017 11:18:41 AM
زیاتر ...