تەندروستی
له‌ئه‌م ده‌رمانخانه‌یه‌ ده‌رزى ماوه‌به‌سه‌رچوو ده‌درێت له‌نه‌خۆش
 ئاڕاسته‌:چاوان حسام
بەهۆی پابەندنەبون بە مەرجەكانی كاركردنی سیستمی تەندروستی و له‌سه‌ر سكاڵای هاوڵاتیان لیژنە هاوبەشەكانی قائیمقامیەتی سلێمانی دەرمانخانەیەك دادەخات.

فریا عه‌بدولره‌حمان ، نوێنه‌ری قائیمقامیه‌تی سلێمانی له‌ لیژنەی هاوبەشی تەندروستی له‌ ڕاگه‌یه‌ندراوێكدا كه‌ وێنه‌یه‌كى بۆ ئاڕاسته‌ نێردراوه‌ رایگەیاند:بەهۆی پابەند نەبونی بە مەرج و رێنماییەكان و كارنەكردن بە‌ سیستمی تەندروستی و هه‌بونی ساكاڵا به‌فرۆشتنی ده‌رزی ماوه‌ به‌سه‌رچوو‌ دەرمانخانەی (فارمه‌سیا) لە شه‌قامی گۆرانی شاری سلێمانی دادەخرێت.

وتیشی: لەكاتی سەردان و پشكنینی لیژنەی هاوبەشی تەندروستی بۆ دەرمانخانەی فارمه‌سیا، دەركەوتووە هه‌مان ئه‌و ده‌رزیه‌ ماوه‌به‌سه‌رچوه‌ی به‌ هاوڵاتیانی فرۆشتوه‌ لە شوێنەكەیدا هەیە كه‌ پێچەوانەی رێنماییەكانی كاركردنە لە دەرمانخانەكاندا.

راشیگەیاند:خاوەنەكەی بەنیازبووە دەرزیه‌ بەسەرچوەكان بەسەر هاوڵاتیانی شاری سلێمانی ساخ بكاتەوە بەبێ رەچاوكردنی زیانی دەرزیه‌كه‌ بۆسەر تەندروستی نەخۆشەكان هاوكات بەفەرمانی قائیمقامی سلێمانی و لەلایەن لیژنە هاوبەشەكانەوە دەرمانخانەكە دادەخرێت و خاوەنەكەشی كارڕای پێویستی بەرامبەر دەگیرێتەبەر.

داواشى كرد: لەكاتی كڕینی دەرمان سەرنج بدەن لە‌ بەرواری دروستكردن و بەسەرچونەكەی ، لەكاتی هەبونی دەرمانی‌ بەسەرچودا لیژنەهاوبەشەكانی لێ ئاگادار بكەنەوە.

692 جار خوێندراوه‌ته‌وه‌
10/25/2018 12:31:28 PM
زیاتر ...
زۆرترین خوێندراو
  • 24 کاتژمێر
  • هەفتە
  • مانگ