بیروڕا
ئارامی … ئارامی
جه‌مال ئارێز
*دروشمی یەكێتی بۆ دوا هەڵبژاردن، سێ بڕگەی لە خۆ گرتبوو، كە بریتی بوون لە «ئارامی، هەلی كار، خزمەت»، بێگومان دروشمی یەكەم كۆدی بەدیهێنانی دوو دروشمەكەی دیكەیە، چونكە دەزانین بەبێ ئارامی، ئەو دوو دروشمەی دیكە بەدی نایەن، خۆ ئەگەر بەدیش بێن، ئەوا لەرزۆك ‌و بێ ئەرزش دەبن، چونكە لەهەموو چركەیەكی لەرزۆكبوونی ئارامیدا، دەشێت ئەگەر ئەو دووانەی دیكە بێنە ئاراشەوە، ئەوا هەرزوو لەناودەچن.
*پێش هەڵبژاردن و دوای هەڵبژاردنیش بەشێكی زۆر لەو رووداو و تاوانانەی كە روو دەدەن، روویانداوە ‌و لەوپەڕی دنیاوە بۆ ئەمپەڕی دنیا، رووداوەكانی كوشتن ‌و دزیی ‌و كاری مافیایی ‌و …هتد، هەبوون ‌و هەن ‌و هەر دەشبن، جا بە پلەی جیاجیا، بەڵام ئەوەی جێگەی سەرنجە لە دوای هاتنە ئارای دروشمی ئارامی-یەوە لەلایەن یەكێتییەوە، بەشێك لەو رووداوانەی كە روو دەدەن كراونەتە دەسكەلایەك بەدەست نەیارانی یەكێتی ‌و دەزگا ئەمنییەكانی لە سنووری سلێمانی ‌و هەڵەبجەو گەرمیان ‌و راپەڕین، بەشێك لە حزبە ركابەرەكان ‌و میدیا فەرمی ‌و سێبەرەكانیان بەشوێن بیانوویەكەوەن كە شەڕە چەقۆی دوو گەنج لەسەر بەرشەو ریاڵ بكەنە دەرفەتێك بۆ بەچاودادانەوەی ئەوەی كە یەكێتی دروشمی ئارامیی بەرزكردبووەوە ئایا ئەمە ئارامییەكەیە؟ وەكو ئەوەی بەر لە بەرزكردنەوەی ئەو دروشمە ئەو رووداوانە روویان نەدابێت.
*راستە پاراستنی ئارامی بەپلەی یەكەم لە ئەستۆی هێزە ئەمنییەكانە ‌و ئەوە هیچ ئەملاو ئەولایەكی تێدا نییە، بەڵام ئارامی بە هەموولایەك دەپارێزرێت، لە پێش هەمووانیشەوە میدیا و سۆشیال میدیا، بۆیە ناشێت ئەو رۆڵە نادیدە بگرین لەسەر بزواندن ‌و ئاراستەكردنی خەڵكدا، كە بەداخەوە ئێستا بەشێك لەو میدیاو سۆشیال میدیایانە هاوتەریب بەو كەسانەی تاوانێك دەكەن، رۆڵ دەبینن لە پەردەپۆشكردنی تاوانباراندا، رووداوەكەی پێرێ نوێترین ‌و بەرجەستەترین نموونەی ئەو رۆڵە نێگەتیڤەی میدیا‌و سۆشیال میدیا بوو كە بینیمان چۆن خەڵك چەواشەكران؟ چۆن هەندێك لە حزب ‌و میدیاكان ئەو دەرفەتەیان قۆستەوە بۆ ئەوەی بیكەنە دەرفەتی پەلاماردانی هێزە ئەمنییەكانی سلێمانی ‌و لەڕێی ئەوانیشەوە پەلاماردانی یەكێتی.
ئارامی چۆن بپارێزین
*لێرەوە وێڕای دەستخۆشیی زۆر بۆ سەرجەم ئەو هێزانەی كە شەو و رۆژیان خستە سەریەك ‌و رۆڵیان بینی لەوەی نەهێڵن 24 سەعات بەسەر رووداوەكەدا بڕوات ‌و هەم تاوانبارەكان دۆزرانەوە و دەستگیركران، هەم پارە دزراوەكەش گێڕدرایەوە بۆ فەرمانبەرانی ئەو فەرمانگەیە، بەڵام دەشێت ئەو رووداوە بە هەند وەربگیرێت ‌و حكومەت ‌و دەزگا ئەمنییەكان ‌و هاووڵاتیانیش و میدیاكانیش وانەی جیاجیای لێ هەڵێنجن:
*دەزگا ئەمنییەكان بەشێوەیەكی لێبڕاوانەتر سیستمی كامێرای چاودێریی پەرەپێبدەن، پەلەی زیاتر لە بابەتی داماڵینی چەك ‌و ئۆتۆمبێلی ژمارە «علوج» و «جام رەش» بكەن ‌و چاوپۆشیی لە هیچ كەسێك نەكرێت.
*میدیاو سۆشیال میدیا لەپێناوی دوو كلیك ‌و بینین زیاتردا، سیناریۆی جیاجیا دانەڕێژن ‌و فاڵگرتنەوە و خۆزگەی سیاسیی بە شرۆڤە و راپۆرتی میدیایی بەخوێنەر نەفرۆشن، چونكە نابێت ئەوەمان لە بیر بچێت هێزە ئەمنییەكان هەموویان كوڕو كچ و براو باوكی خۆمانن ‌و لە هەموو ئەو كاتانەی ئێمەمانان بە پشتی ئەوان دەچینە گەشت ‌و سەیران ‌و ئارامیی ‌و ئاسایشمان پارێزراوە، لە سایەی ماندووبوون ‌و بێبەشبوونی منداڵ ‌و هاوسەر‌و خێزانی ئەواندایە لە سەیران ‌و گەشت ‌و خۆشی.
نوكتە‌و تەنزی بێ مۆراڵ
*با خۆمان بخەینە شوێنی هەریەك لەو فەرمانبەرانەی كە دوێنی مووچەكەیان بەو دەردە برابوو، ئاخۆ دەبێت هەریەك لەوانە چەند ئومێدی لەسەر ئەو مووچەیە لە دوای نزیكەی چوار ساڵ لە مەینەتیی پاشەكەوت هەڵچنیبێت، بەڵام لانیكەم لەجیاتی هاوكاریی دەزگا ئەمنییەكان، هەندێك كەسی بێ سەلیقە كەوتنە دروستكردنی كاریكاتێر ‌و نوكتە دروستكردن ‌و دانانی گرتەی ڤیدیۆیی وەك گاڵتەكردن بەو فەرمانبەرانەی كە چاوەڕوانی مووچەكانیان بوون و بەو دەردە چووبوو، ئاخۆ ئەوانەی ئەوەیان كرد بیریان لە ئارامیی دەروونیی ئەو كەسانە كردەوە؟ لەكاتێكدا بەتایبەت ئەو فەرمانبەر و كارمەندانەی «نەخۆشخانەی شار» لەماوەی 2014- 2019 سەرەڕای هەموو مانگرتن ‌و خۆپیشاندانەكانی ئەو ساڵانە كارەكانیان رانەگرت كە پەیوەست بوو بە تەندروستیی هاووڵاتیانەوە، بەڵام لەو بارە نائارامییە دەروونییەدا هەندێک لە هاووڵاتیان لە سۆشیال میدیاوە بەوجۆرە هاوبەشی خەمیان دەبن، كە ئەوە ئەو پەڕی بێ مۆراڵی بوو.
‌‌ زیاتر ...
بورهان عه‌بدولڕه‌حمان
دکتۆر محەمەدئەمین
جه‌مال ئارێز
هونه‌ر ره‌سوڵ ئه‌حمه‌د
زۆرترین خوێندراو
  • 24 کاتژمێر
  • هەفتە
  • مانگ