بیروڕا
سەگەكانی زانكۆ
ژوان ئه‌حمه‌د سه‌عید
ئەوەی هەڕەشە لە خوێندكار دەكات چ كچ یان كوڕ، خۆی سەگە چ پێویستی بەوە نیە سەگ بەربداتە خوێندكارەكان.

دەمێك ساڵە زانكۆ لەم ولاتەی ئێمەدا جەوهەری خۆی لەدەستداوە، ئەویش چەندە سوچی خوێندكارە كە زۆربەی خەریكی فاشیۆن‌و كەمالیاتن، سەدان هێندە سوچی حكومەت‌و پاشانیش حزبەكانە كە زانكۆ وەك ناوەندێك بۆ ململانێ‌و مەیسەر كردنی دەسكەوت سەیر دەكەن.

ئێستا زانكۆ نە جێی بەرەڵایی وەك مەلاكان دەیڵێن، نە جێی ماچوموچە وەك لۆتیەك دەیڵێت، بەڵكو ڕێك دەقاودەق قسەكەی فۆكۆیە كە دەڵێت: زانكۆ شوێنێكی باشە بۆ ئەوانەی دەیانەوێت خۆیان بە شتێكەوە سەرقاڵ بكەن.

كاتێك زانكۆی ئەهلی دەكرێتەوە ئیدی ئاشكرایە كە ئەوە هەنگاوە بۆ بێبەها كردنی زانكۆ حكومیەكان، كاتێكیش وەزیرێك یان سەرۆكی زانكۆ دەستی لەگەڵ بازرگانان تێكەڵ دەكات‌و بەشێك دادەخات یان خوێندنی ئێواران دادەخات بۆ ئەوەی زانكۆ ئەهلیەكان جمەی بێت ئیدی ئاشكرا دەبێت كە خوێندكاریش بۆتە كالایەك بۆ دەوڵەمەندتر كردنی سەرمایەدارەكان‌و چیتر نەوەی دواڕۆژ نین‌و كالای گرانی ئێستا‌و ئێكسپایەری داهاتون.

لەم وڵاتە بە بەرنامە كار بۆ بێبەها كردنی هەموو ناوەندەكانی خزمەتگوزاری گشتی كراوە، ببینە لەسەرەتا چۆن مامۆستا بێڕێز كرا تا گەیشتە ئەوەی لەسەر قەسابخانەكان بنوسرێت: ئێسقان بە هەرزان بۆ مامۆستایان

دادگاكان بە تێئاخنینی ددوەری پەڕپوت‌و ویژدان فرۆشراو چۆن بون بە دیل

زانكۆكان بە لێشاوی تەمەڵەكان كە بە واستە‌و پارە بەدەست لەپشتدانی سەری گەورەكانی سیاسەت بڕوانامەیان لە لوبنان‌و میسر‌و قوبرس‌و ئێران‌و سودان هێنا چۆن گۆڕان بۆ ناوەندێك بۆ پەروەردە كردنی نەوەیەكی ناكامڵ لە زانست‌و بەها كۆمەلایەتیەكان.

بۆیە ئەبێت بەلاتەوە ئاسایی بێت شەقاوەیەكیش بێت نەك سەگ بەڵكو ئاگریش لە جەستەت بەربدات بە هەر بیانویەك بێت‌و رێكخراوەكانی خوێندكارانیش ببنە دووبەرە، بەرەیەكی بێدەنگ‌و داماو، بەرەیەكیش بۆ دوو دەنگ دەیكاتە هەرا
میدیا دوو كەرت دەكات، یەكێكیان فەرامۆش‌و بێدەنگ ئەویش بۆ دوو دەنگ‌و شەپۆلێكی نارەزایی دەیكاتە هەڵا

لە هەموو كات خوێندكاران داینەمۆ بون، بۆیە لەمەشدا خوێندكارانی زانكۆ نابێت ببنە سوتەمەنی هیچ ململانێیەك‌و پێویستە خۆیان نمایندەی خۆیان بن دوور لە هەموو ڕێكخراوەكان چ ئەوانەی زەلیل‌و بێدەنگن، یان ئەوانەی دەیانەوێت خۆیان بكەنە پاڵەوان‌و بایكۆت بە خوێندكاران بكەن... با خوێندكارانی زانكۆی سلێمانی خۆیان ڕێكبخەن‌و هەموو سەگە دوو پێكان ریسوا‌و شەرمەزار بكەن‌و بیسەلمێنن كە ئەوان خاوەنی زانكۆن نەك ئەو ئەفەندیانەی بە دوو ئۆباڵ كێشان‌و ملپانی بون بە بەرپرس، بەمەش خۆیشیان‌وناوبانگ‌و پێگەی زانكۆكەشیان بەهێزتر‌و گەورەتر دەكەن.

دەبێت خوێندكاران نەهێڵن حەپەی هەندێك یان زماندرێژی هەندێك ڕاگەیاندنی بەناو ئەهلی ئەوانیش رابكێشێتە ناو لیخنی سیاسەتی پیس، بەڵكو بە فشاری خۆیان كێشەكە تا ئەوپەڕی چارەسەر ببەن‌و هەم سەگە دووپێكان‌و هەم چەقەڵە لەبۆسە نراوەكانی سیاسەت‌و میدیای بەناو ئەهلی لەخۆیان دوربخەنەوە.
‌‌ زیاتر ...
شادمان مەلا حەسەن
ژوان ئه‌حمه‌د سه‌عید
شادمان مەلا حەسەن
سەعدی ئەحمەد پیرە
زۆرترین خوێندراو
  • 24 کاتژمێر
  • هەفتە
  • مانگ