بیروڕا
کابینەی نوێ و کارنامەی ئایندە
مستەفا محەمەد


خولی تازەی پەرلەمانی کوردستان دەست بەکارەکانی خۆی دەکا و هەنگاوەکانی پێکهێنانی کابینەی نوێی حکومەتیش هێدی هێدی گەرمتر دەبن، ئەگەرچی تائێستا ڕوون نیە کە پێکهێنەرەکانی حکومەت کێن و کارنامەی کابینەکە چۆن تەبەنی دەکرێ، بەڵام وا پێدەچێ خاڵی هاوبەش زۆرتربن لە ناکۆکیەکان و خواستی زۆرینەی لایەنەکانیش بە لای بەشداربووندا بشکێتەوە، بە واتایەکی تر کابینەی نوێ هاوشێوەی ئەوەی پێشوو بە کابینەیەکی ئیئتلافی و نیمچە فراوان لەدایک دەبێ و بەشداری زۆرینەی حزب و قەوارەکانیش تیایدا ڕەنگ دەداتەوە.
سەرنج زۆرە لەبارەی ئەوەی لەڕابردودا بۆچی نەتوانرا ئەزمونی بنکەفراوان بگەیەنرێتە کۆتاییەکی پڕ خێر کە ئەوە بابەتی ووتارەکەی ئێمە نیە ، بەڵام زۆرینەی لایەنەکان بۆیان ڕوون بۆتەوە هێشتا مەترسیە گەورەکە کە جێگیرنەبوونی ماف و دەسکەوتە دەستوریەکانی هەرێمە لە عێڕاقدا نەگەیشتوونەتە کەناری ئارامی ، هەر ئەوەشە لەسەر لایەنە ناکۆکەکانی هەرێمی ئیجاب کردوە کە تەجاوزی ئەو گرفت و ئاریشانەی نێوانیان بکەن و بە دوور لە ووردکردنەوەی ناکۆکیەکان و مامەڵەی زۆرینە و کەمینە و دروشمبازی پوچ و بێ بەهاو مەبدەئی سەرکەوتوو و دۆڕاو و لێدانی نوقڵانەی حکومەتی تاک لایەنە، لەسەر مێزی گفتوگۆ کۆببنەوە و ڕێگە خۆش بکرێ بۆ بەشداریەکی فیعلی هەمووان تا لە بەرپرسیارێتی چاککردنی دۆخی شڵەژاوی سیاسی و ئابوری هەرێمدا ڕۆڵ بگێڕن.
بۆئەوەی ئەم کابینەیە سەرکەوتووبێ گرنگتر لە هەر شتێ پێویستە لە کارنامەکەیدا بە کردەوە بەڵێنەکانی پێکهێنەرەکانی جێ بەجێ بکا، لەسەروهەموشیانەوە لەبارەی بارودۆخی ژیانی هاوڵاتیان قسەی یەکلایی کەوەی پێ بێت ، بە بێ پەیماندان و تەئجیل و تەئخیر کاری لە پێشینەی جاڕی کۆتایی هاتنی بێ سێ و دووی سیستەمی پاشەکەوت، هاوکات بیرۆکەی چارەنوسی قەرزەکانی حکومەت و وەگەرخستنەوەی پڕۆژە ستراتیژیەکان، هەنگاوەکانی چاکسازی و دووبارە یەکسان دابەشکردنەوەی داهاتەکان، پێداچوونەوە بە دامەزراوە یاساییەکان و دیاری کردنی دەسەڵاتەکان لە هەرێمدا بکاتە توێشووی چوار ساڵی خۆی و هیوای خەڵک بۆ گۆڕانکاری ڕیشەیی لەبەڕێوبەردنی حکومەتێکی بێ قەیراندا زیاتر بکا.
بۆ لایەنە سیاسیەکانیش تا بناغەی کەلتوری حوکمڕانیەکی تەندروست دابڕێژن و پڕۆسەی دیموکراسیش بەرهەمدارتر بکەن کە بەڕای من تا ئێستاش بەتەواوی غائیبە و دەشێ لە دانوستانەکانی پێکهێنانی حکومەتدا بێتە ئاراوە، لەدایکبوونی هەلومەرجێکی شیاو و زەمینەیەکی گونجاوە بۆ ئۆپۆزسیۆنێکی کارا و چاودێرێکی ڕاستەقینە بەسەر کارەکانی حکومەتدا، بەجۆرێ دووربێ لە موزایەدەی سیاسی و سەپاندنی زەمینەی ( تەنها من ڕاستم ) لە هەوڵی دروستکردنی متمانە بە گوێزانەوەمان لەقۆناغێکی قەیراناوی بۆ قۆناغێکی باشتردا ڕۆڵی هەبێ و شوێن پەنجەشی لە ڕاستکردنەوەی ڕێچکەی خزمەت و بەهێزکردنی پایەکانی دیموکراسی و هێنانەکایەی حوکمڕانیەکی تەندروست و ڕەشیددا بەجێ بهێڵێ.
‌‌ زیاتر ...
شادمان مەلا حەسەن
سەعدی ئەحمەد پیرە
زۆرترین خوێندراو
  • 24 کاتژمێر
  • هەفتە
  • مانگ