بیروڕا
چۆن هەڵەکان ڕاست بکەینەوە؟!
مستەفا محەمەد
لە ئێستادا قۆناغێکی گرنگی ڕاگوزەریی سیاسی کە دەشێ لێکەوتەکانی مەجرای حوکمداری بگۆڕێ بەنسبەت کوردەوە لەعێراقدا هەستی پێ دەکرێ ، بە سەرنجدانیش لە پێشهاتە سیاسیەکانی کوردستان و عێراق و ناوچەکە و هەردو تەڕەفی ناکۆک ( هەولێر و بەغدا ) بۆت دەردەکەوێ کە لەسەر بنەمای هاوڵاتی بوون و بەرژەوەندی هاوبەش و بەشداری هەمەلایەنە کەشێکی لەبارە بۆ دەسپێکی پەیوەندیەکی باشتر لەنێوان هەرێم و نەوەند دا ، وەلە ووردکردنەوەی هەنگاوەکان و دەرەنجامی لێکەوتە سیاسیەکان ڕاستیەکی حاشاهەڵنەگر هەیە لەبارەی ئەو بەند و بالۆرانەی جاران بۆ موقاتەعەکردنی بەغدا و جیابوونەوە و سەربەخۆیی و لەدایک بوونی دەوڵەتێکی کوردی دەوترا دواجار تەنها ئەجندایەکی حزبی کاتی و عەفەوی بێ پلانی دوور لە لۆژیکی سیاسی لێ گەڵاڵە بوو ، دوای ئەو هەموو تەخوینکردنەی لە هەرێمدا گوێبیستی دەبوین کەچی حاڵی حازر هەموو لایەک گەیشتونەتە ئەو دەرەنجامەی کە کلیلی کەیسە هەڵواسراوەکانی هەرێم و چەقی چارەسەری کێشەکانی کورد بەغدایە ، نەک دەوڵەتانی دراوسێ! لەمیانی سەردانی ئەم دواییەی کەسایەتیە سیاسیەکانی کوردستان بۆ بەغدا ئەوەی بەدی دەکرێ پرسە نیشتمانیەکان کەمتر وەک جێی بایەخ ئیبرازدەکرێن ، بەلکو لە جێی ئەوە ئیدارەدانێکی سەرپێی پەیوەندیە حزبیکانن ، نەک دانوستان بێ لە پێناو گەیشتن بە بەرنامەیەکی کاری هەمەلایەنە و هەڵێنجراو لە خەم و داخوازیەکانی شەقامی کوردی ، ئاراستەی سەرەکی ئەم دابەشبوونەش وای کردووە کە ڕۆژ لەدوای ڕۆژ دەسکەوت و داخوازیە ڕەواکانی کورد لەڕووی قەبارەوە و گرنگیەوە لەکورتی بدەن بەجۆرێک لە خەمی خاک و مافی دەستووری نەتەوەیەکەوە بۆ شەڕی قوتی ژیان و پشکی بوجە و لەویشەوە بۆ پچڕینی پۆست و ئیمتیازاتدا بچوک کراونەتەوە. ئەوەی جێی نیگەرانیە هێزە سیاسیە کوردیەکان کێبڕکێیانە بۆ ناردنی وەفدی باڵا بۆ دانوستان لەگەڵ بەغداد دا ، کەچی بەداخەوە لە هەرێمدا بەکردەوە هەنگاوی دڵخۆشکەر نابینی و خۆمان کارێکی وامان کردوە ململانێ نێوخۆییەکانمان تێنەپەڕێنین ، ئەمەش وایکردووە هەوڵی سیاسیەکان بۆ ململانێی پچڕینی مافی گەلێکی بەش مەینەت بێ ئەرزش بکرێ و لەهاوکێشە سیاسیەکانیشدا ئیعتبارێکی ئەوتۆمان نەبێ ، ئەدی کەوایە پلان چیە بۆ بەهێزکردنەوەی ڕۆڵی کورد ؟ یا ئەوەی کە دەوترێ لەبارەی هەڵەکانمانەوە ، ئەرێ چۆن دەتوانین ڕاستیان بکەینەوە؟ لە ڕاستیدا هەڵەکانی نێوان عێڕاق و هەرێم بەسەردانێک یا دووان ڕاست ناکرێتەوە ، بەڵکو ئاسۆی چارەبوونیان بە چونە ناو گفتوگۆیەکی ڕاستەوخۆی بێ مەرج دەبێ لەگەڵ بەغدا کە هەڵێنجراوی تێڕوانین و ڕوئیایەکی نیشتمانی و نەتەوەیی بێ ، بەرژەوەندی هاوڵاتیان لە خەمی خاک و شێوازەکانی ژیانیانیاندا لەپێشنەی سەرنجەکان بن ، وە گێڕانەوەی پێگەی بەهێزی هەرێم بە بینینی تاک لایەنەی ئەم بەرپرس و ئەو سەرکردەیەی عێڕاقی نایەتەدی بەڵکو بەدروستکردنی بەرەیەکی کراوە لە نوێنەرانی سەرجەم لایەنە بەشداربووەکانی پڕۆسەی سیاسی دەستەبەردەبێ کە لە پێکهاتەی وەفدی دانوستکاردا ڕەنگ بداتەوە، ئەوسا ئەو نوێنەرایەتیەش پێویستە خودان پێشنیازی نوێ و کرداریی بێ و ڕەشنوس و وەڕەقەیەکی کار بۆ بوژاندنەوەی ژێرخان و بونیادی مەعریفی تاکەکان لەگەڵ بەرپرسانی عێراقیدا بکاتە بنەما و چەقی گفتوگۆکانی . وە بۆ ناتەواوی و هەڵەکانی ناوخۆش هەنگاوی فیعلی گەرەکە کە بێگومان بە کاری پێکەوەیی و بە تێپەڕاندنی ناکۆکیە لاوەکیەکان و هێنانەکایەی کەشێکی گفتوگۆی لەبار ڕاست دەکرێتەوە ، ئەم بیرۆکەی یەک ڕیتمییەش ئیجاب دەکا کاری لەپێشینەی دۆزینەوەی خاڵە هاوبەشەکان بێ لەنێو گێرمە و کیشەی لایەنەکاندا تا بە هەموولایەک ڕەسمی سیاسەتێکی سەردەمیانە و گونجاو بۆ شەئنە عێراقی و ئیقلیمیەکان بونیادبنێ ، خۆ ئەگەر ئەمە کرا ئەوە بێگومان ئەو سیاسەتە مەدروسە ڕەنگدانەوەی ڕاستەوخۆشی دەبێ بۆ هەنگاوەکانی لەمەودوای لایەنە کوردیەکان تا لە بازنەی پارێزگاری کردن لە دەسکەوت و مافە نەتەوەییەکانی گەلی کورد لە عێراقدا دەرنەچن.
‌‌ زیاتر ...
شادمان مەلا حەسەن
ژوان ئه‌حمه‌د سه‌عید
شادمان مەلا حەسەن
سەعدی ئەحمەد پیرە
زۆرترین خوێندراو
  • 24 کاتژمێر
  • هەفتە
  • مانگ