بیروڕا
رێگای‌ به‌غدا ئارام نیه‌
سه‌ربه‌ست جیهاد


 له‌ دوای‌ ریفراندۆمه‌وه‌ ده‌یان ده‌ستپێشخه‌ری‌ و كۆششی‌ چاكه‌خوازانه‌ی‌ عیراقی‌ و نێونه‌ته‌وه‌یی‌ بۆ چاره‌سه‌ری‌ كێشه‌ی‌ سیاسی‌ ئابووری‌ و ئه‌منی‌ هه‌رێمی‌ كوردستان و عیراق كراون ، به‌ڵام هه‌موویان له‌لایه‌ن حكومه‌تی‌ فیدرالی‌ ره‌ت كراونه‌وه‌ . 
 هه‌نجه‌تی‌ سه‌رۆك وه‌زیران ئه‌وه‌یه‌ هێشتا هه‌رێمه‌كه‌مان روون و راشكا و نه‌یفه‌رمووه‌ له‌ هه‌موو پرسی‌ په‌شیمانین و په‌یمان ده‌ده‌ین تا ( قامی‌ قیامه‌ت ) هه‌روا ژێرده‌سته‌ی‌ عیراق ده‌بین . 
 له‌ هه‌فته‌ی‌ یه‌كه‌می‌ دوای‌ هه‌مووپرسی‌ هه‌رێمی‌ كوردستان به‌ ته‌جمیدكردن رازی‌ بوو ، جێگری‌ سه‌رۆك كۆمار ( عه‌لاوی‌ ) موباده‌ره‌ یه‌كی‌ كرد و سه‌رۆكی‌ ئه‌وكاتی‌ هه‌رێم قایل بوو ریفراندۆم سڕ بكا ، پاشان دادگای‌ فیدرالی‌ حوكمی‌ هه‌ڵوه‌شانه‌وه‌ی‌ ریفراندۆمیدا ، ئه‌و حوكمه‌ش ته‌قدیر كرا ، به‌ڵام تازه‌ سه‌رۆك وه‌زیران ێیژێ خێر ده‌بێ بێژن ( پابه‌ندین ) به‌ قه‌راری‌ دادگای‌ ده‌ستوور .
 خۆ ئه‌و ده‌سته‌واژه‌یه‌ش ئه‌گه‌ر بكرێته‌ پاشكۆی‌ رسته‌ی‌ ( رێز له‌ قه‌راری‌ مه‌حكه‌مه‌ی‌ ئیتیحادی‌ ) ده‌گرین ، بۆ حكومه‌تی‌ ئێمه‌ كه‌ له‌ دۆخێكی‌ ناهه‌مواری‌ سیاسی‌ ئابووریدایه‌ ، نه‌نگی‌ نیه‌ و ره‌نگه‌ وه‌ك جۆرێك له‌خۆپارێزی‌ ( ته‌قیه‌ ) لێكبدرێته‌وه‌ ، به‌ڵام داخوا به‌غدا رازی‌ ده‌كا و ( پابه‌ند ) بوون ده‌بێته‌ بیانوو بڕ ?
 ئه‌م ره‌تكردنه‌وه‌یه‌ ، به‌داخه‌وه‌ لێره‌ و له‌وێ پاساو ده‌درێته‌وه‌ و مه‌سئولیه‌تی‌ ته‌نگنایه‌كه‌ هه‌ر به‌ ته‌نێ ده‌خرێته‌ ئه‌ستۆی‌ حكومه‌ت و ده‌سه‌ڵاتی‌ سیاسی‌ هه‌رێم ، یانه‌كو هه‌ندێك وای‌ ته‌فسیر ده‌كه‌ن ره‌تكردنه‌وه‌ی‌ دان و ستاندن له‌سه‌رره‌قی‌ فیتری‌ ( حه‌یده‌ر عیبادی‌ ) بناوان هه‌ڵده‌گرێ ، خۆ لێكدانه‌وه‌ی‌ واش هه‌یه‌ بۆ ئه‌وه‌ ده‌چێ به‌ هۆی‌ نزیكبوونه‌وه‌ی‌ واده‌ی‌ هه‌ڵبژاردن ( سه‌رۆك وه‌زیران ) نایه‌وێ پێگه‌كه‌ی‌ بكاته‌ قوربانی‌ دیالۆگ ، به‌و ده‌لیله‌ی‌ وه‌سیله‌ی‌ ئاسانتر و كاریگه‌رتری‌ له‌ جۆری‌ جوڵاندنی‌ سوپا و پۆلیس و حه‌شد و گه‌مارۆ و برسیكردن و هه‌راسانكردن و .. تاد له‌به‌رده‌ستدایه‌ .
 به‌شی‌ زۆری‌ ئه‌و پاساو و ته‌فسیرانه‌ له‌ سه‌رینی‌ ناكۆكی‌ قووڵی‌ ناوخۆی‌ هه‌رێمه‌كه‌مانه‌وه‌یه‌ ، ناته‌بایی‌ به‌رچاوی‌ تاریك كردووینه‌ تا ئه‌و ئه‌ندازه‌یه‌ی‌ ستراتیجی‌ ناحه‌زانه‌ی‌ به‌غدا وه‌كو خۆی‌ نه‌بینین كه‌ هیچ ، بڕو بیانووشی‌ بۆ ببینینه‌وه‌ .
 بمانه‌وێ تێبگه‌ین یانه‌كو خۆمان نه‌بان كه‌ین هیچ له‌ و راستیه‌ كه‌م و زیاد ناكا ، عینادی‌ ( عیبادی‌ ) له‌ پای‌ به‌ ئامانج گه‌یاندنی‌ سیاسه‌تێكه‌ له‌ مێژه‌  حكومه‌تی‌ عیراق به‌شێنه‌یی‌ كاری‌ له‌سه‌ر ده‌كا و دوای‌ ریفراندۆم و كۆتایی‌ داعش  فرسه‌ت ته‌ڵه‌بانه‌ هه‌نگاوه‌كانی‌ بله‌ز ده‌كا . سه‌ره‌تاكانی‌ سیاسه‌تی‌ گه‌مارۆدانی‌ هه‌رێمی‌ كوردستان و راگرتن و له‌كه‌وه‌دانی‌ له‌ سنووره‌كانی‌ پێش 2003  به‌ زه‌بری‌ هێز ، بێبه‌شكردنی‌ له‌ سه‌رچاوه‌كانی‌ داهات و خۆ بژێوی‌ ،  كه‌ تێكڕایان كۆپێكردنه‌وه‌ی‌ سیاسه‌تی‌ ده‌وڵه‌ت و حكومه‌ته‌كانی‌ عیراقه‌ به‌ پاشایی‌ و كۆماریه‌وه‌ ، له‌ بنیاتنانه‌وه‌ی‌ ده‌وڵه‌تی‌ عیراق دوای‌ پرۆسه‌ی‌ ئازادی‌ به‌دیاركه‌ووتوه‌ .  خۆدزینه‌وه‌ له‌ جێبه‌جێكردنی‌ مادده‌ی‌ 140 ، له‌شكركێشی‌ 2008 و پاشان دروستكردنی‌ عه‌مه‌لیاتی‌ دیجله‌ و هه‌ڕه‌شه‌كانی‌ عه‌بدئه‌میر زه‌یدی‌ ، ده‌ركردن یان ناچاركردنی‌ ئه‌فسه‌ران و سه‌ربازانی‌ كورد له‌ ریزه‌كانی‌ سوپا و پشتگوێ خستنی‌ پێشمه‌رگه‌ و ده‌رنه‌چواندنی‌ یاسای‌ نه‌وت و گاز و سه‌ره‌نجام بڕینی‌ بودجه‌ی‌ هه‌رێمی‌ كوردستان ، به‌دیارخه‌ری‌ تان و پۆی‌ سیاسه‌تێكی‌ مه‌دروسه‌ كه‌ وا عیبادی‌ ده‌یه‌وێ بیگه‌یه‌نێته‌ دوا قۆناغ ، 
3 مانگی‌ رابردوو بۆ ئێمه‌ دانیشتوانی‌ كوردستان قورسترین رۆژانی‌ بێئومێدی‌ بوونه‌ ، هێشتا له‌ ئاسۆگه‌ڕا تروسكایی‌ هیوا دیار نیه‌ ، دۆستانمان له‌ عیراق و ده‌ره‌وه‌ هه‌روا خه‌ریكن سا به‌ڵكو عیراق قانع بكه‌ن بۆ گفتوگۆ ،  هه‌ڵبه‌ت بۆ ره‌واندنه‌وه‌ی‌ ئه‌و تاریكستانه‌ خیاری‌ گفتوگۆ باشترینه‌ ، به‌ڵام دیالۆگ كاتێك مانا ده‌دا كه‌ هه‌ق بۆ هه‌ق خوراو بگێڕێته‌وه‌ ، به‌ڵام كه‌ له‌ ناوخۆمان له‌سه‌ر مافی‌ خۆمان ته‌با نه‌بین نابێ چاوه‌ڕێی‌ هیچ له‌ دان و ستان بكه‌ین .
‌‌ زیاتر ...
فه‌رید ئه‌سه‌سه‌رد
ستران عەبدووڵا
فه‌رید ئه‌سه‌سه‌رد
ستران عەبدووڵا
عەبدولواحید محەمەد
رێبواری ئیعلام
زۆرترین خوێندراو
  • 24 کاتژمێر
  • هەفتە
  • مانگ