بیروڕا
هاوڵاتی لە نێوان فەوزای میدیایی و سیاسی
چرۆ شەهاب

ماوەیەكی زۆرە نەم دەویست لەم فەوزایەی میدیا و سیاسەتدا قسەبكەم, بەڵام بەداخەوە كە مرۆڤ ناتوانێت لەنێوان نا دادپەروەری سیاسیەكان و میدیاكان بێدەنگ ببێت.
دۆخێكی دژوار و ناخۆش, دڵەڕاوكێیەكی لە ڕادە بەدەر, زۆر بونی ڕق و كینە, دژایەتی كردنی یەكتری و قەبوڵنەكردنی دید و بۆچونەكانی یەكدی, ئەمانە و زۆر نەهامەتی و ناخۆشی كە خۆی لە گەردنی گەورەو بچوكی ئەم كوردستانەوە ئاڵاندوە.
بەداخەوە كە زۆرێك لە میدیای نا بەرپرس و بەشێك لە بەناو چالاكوانی بەردەم میدیا و بەشێكی زۆریش لە بەرپرسان زۆر نا  بەرپرسانە مامەڵە لەگەڵ ئەم دۆخە نەخوازراوە دەكەن ئەمەش وایكردووە كە  :
یەكەم: خەڵك لە قات وقڕیەكی گەورە بترسێت و هەرچی خۆراك و پێداویستی تزیك لە ماوە بەسەر چو بە نرخێكی گران بەسەر هاووڵاتیاندا ساغ بكرێنەوە  , كە بێگومان ئەمە مەترسیە سەرەكیەكەیە, بەم گەرما زۆرە چۆن ئەو بڕە خۆراكە لە نێو ماڵدا وبێ گوێدانە پلەی گەرمی و ساردی بۆخواردنەكان هەڵدەگیرێن و پاشانیش هاوڵاتی لەبری ئەوەی خۆی لە مەترسی برسی بون بپارێزێت ,خۆی دوچاری خۆراكی ماوە بەسەرچو و نا تەندروست دەكات و لێرەدا دوچاری مەترسی دەبێتەوە لە ڕوی تەندروستیەوە, لەڕاستیدا تۆڕەكۆمەڵایەتیەكان و میدیا بە گشتی بەرپرسیارێتی زۆریان كەوتۆتە ئەستۆ لە بڵاوكردنەوەی ئەو ترسە بە شێوازێكی زۆر كاریگەر و دور لەهەر بەهایەكی كۆمەڵایەتی و ئەتوانین بڵێین بەشێكیان بە ناڕاستەو خۆ بونەتە شەریكی ساغكردنەوەی بازاڕ بەسەر خەڵكی كەم دەرامەت و هەژاران و بەرزبونەوەی نرخەكان بەشێوەیەكی لە ڕادەبەدەر..
دوەم: بەشێك لە چالاكوانەكانمان ڕۆڵی نەرێنی دەبینن لە تەنگەشە سیایەكان ,كە من نازانم كێ ئەم ناوەی بەسەردا دابڕیون و بون بە چالاك, ئێ باشە هەر تاكێك لەم كۆمڵگەیەی ئێمە ڕۆژانە دەیان كار دەكات ,مامۆستا چالاكە لە كارەكەی خۆیدا هەر بە دەلیلی ئەوەی خوێندكاری زۆر زیرەكمان هەبوو ئەم ساڵ  توانی یەكەمی هەرێم بێت, فەرمانبەر ,ئەمیش ڕۆژانە زۆر چالاكانە كاری خۆی جێ بەجێ دەكات ئەمیش بە دەلیلی ئەوەی كار و باری هاوڵاتیان لە فەرمانگەكانی حكومەت نەوەستاوە كەواتە ئەمانیش زۆر چالاكن, كەرتی تەندروستی و سەرجەم كەرتەكانی تر و تەنانەت كرێكارێكیش زۆر مەرد و چالاكانە كرێكاری خۆی دەكات و بە چالاكی خۆی بژێوی ژیانی پەیدا دەكات, پێشمەرگە لەبەرەكانی پارێزگاری لە هاونیشتمانیان و خاك و كەرامەتی هەموومان دەكات و خوێن و گیانی خۆی بەخت دەكات زۆرترین چالاكە, ئەی ئەمانە چالاك نەبن كێ چالاكە؟
كەواتە چالاك بون بە بڕوای من تەنها خۆی لە چالاكیەكانی چالاكوانەكانی نێو هۆتێل و باڵەخانەكان ناگرێتەوە , ئەوە ئازایەتی نیە لەبەردەم سپلیت و پشت مێز و لە ئۆفیسە كەشخەكانەوە چالاك بن كە كەس نازانێت پارەی كرێ و ڕاكەڕاكی " چالاكیەكانتان"  سەرچاوەكەی لە كوێوە هەڵ دەقوڵێت, كەس پێم نەڵێت خۆبەخشین, شتێك نەماوە ناوی خۆبەخشی بێت, ئەمڕۆ تەنها و تەنها بەرژەوەندی لە پێش خزمەت و خۆبەخشیەوەیە, چالاكەوانەكانی كۆمەڵگەی مەدەنی ئەمڕۆ و لەم دۆخەدا گرنگە تۆوی ئاشتەوای نیشتمانی بچێنن و نەبنە بەشێك لە ململانێكان,كە بەداخەوە بەڕێژەیەكی بەرچاو پێچەوانەكەی دەبینین, ئەركی ئێوە لەم تەنگەشە سیاسی و فەوزایەی كە میللەتی تێكەوتوە دەردەكەوێت ئایا بەڕاستی چالاكوانی كۆمەڵگەی مەدەنین؟
سێهەم: میدیا و بەرپرسیارێتیە گەورەكەی سەرشانی , تەنها ڕۆژانە سەیری میدیا كان بكەین خۆ هەموو هاوڵاتی ئەم نیشتمانە ئەبێت قەبر بۆ خۆی هەڵكەنێت, بەشێك لەم میدیایانە نابەرپرسانە بەشداری سەرەكین لە تێكدانی باری دەرونی هاوڵاتی , ئەوە سایت و ماڵپەڕ و تۆڕەكۆمەڵایەتیەكان هەر باس ناكرێن, من دەپرسم چەندین كەناڵ و ماڵپەڕ هەیە ڕۆژانە تەنها بە بلاوكردنەوەی بە پەلەكانیان لەسەر موچە و دابەشكردنی یاری بە موقەدەسات و ژیانی هاوڵاتی ناكات و دەرونیان تێك نادات؟ ئەی ئەگەر ویژدان هەبێت و یاسا هەبێت كە لێپرسینەوە لە گەندەڵ كاران بكات خۆ ئەبێت لێپرسینەوە لەگەڵ ئەو میدیایانەدا بكات كە وەك عەزرائیل كەوتۆتە ڕۆح كێشانی دەرونی هاوڵاتی و هەر بە لۆكە دەیان كوژێت.
چوارەم : بەرپرسیارێتی بەرپرسان لە بژێوی ژیانی هاوڵاتی ئەم نیشتمانە, بێگومان ئەمانە چەمكی هەرە زۆری ناداد پەروەری و دابین نەكردنی مافە سەرەتاییەكان بۆ هاوڵاتیان بەردەكەوێت, چونكە ئەمانە ئەركی سەرشانیانە لەبەرامبەر موچە خۆر و دابینكاریكانی ژیانی هاوڵاتی ئاوا و وەك ئێستا دەستەوسان نەوەستن , ئەركی حكومەتە لەم قەیرانەدا ئەولەویتی كارەكانی موچەی فەرمانبەران و پێشمەرگە و كەس و كاری شەهیدان و مامۆستایان و خاوەن پێداویستیە تایبەتەكان بێت, ئەركێتی هەرچی پڕۆژەی نا خزمەتگوزاریە بیوەستێنن, ئەركێتی هەرچی ئیفادی بەرپرسان و یەكە ئیداریەكان هەیە بۆ دەرەوە ڕایان بگرن, ئەركێتی پێداچونەوە بە و باجانەدا بكات كە سەرمایەدارەكانی بە جۆرێك لە جۆرەكان خۆیان لێدزیوەتەوە ,ئەركێتی تەنانەت بودجەی پارتە سیاسیەكانیش ڕابگرێت,ئەركێتی تەنانەت بودجەو هاوكاری ڕێكخراوەكانی كۆمەڵگەی مەدەنیش ڕابگرێت, ئەركێتی لە خزمەت خەڵك بێت و متمانە بۆ خۆی بگێڕێتەوە , ئەم متمانەیەش تەنها بە چارەسەركردنی بژێوی ژیانی هاونیشتمانی و بوژانەوەی بازاڕ چارەسەر دەكرێت. ئەو كاتەش كە ئەمانەت ئەنجاندا دەشێت داوا لە هاوڵاتی و هەوادار و ئەندام و لایەنگرەكانتان بكەن لە هەر پرۆسەیەكی نەتەوایەتی و نیشتمانی و حزبایەتیتان پشتیوانتان بن لە دەنگدان, كە بێگومان پرسی سەربەخۆییش یەكێكە لە پرسە هەرە گرنگەكان,كەواتە گەڕاندنەوەی متمانە لە ئەولەویەتەكانتان بێت ..

‌‌ زیاتر ...
فه‌رید ئه‌سه‌سه‌رد
بورهان شێخ ڕه‌ئوف
سه‌ربه‌ست جیهاد
د.به‌ختیارشاوه‌یس
بورهان شێخ ڕه‌ئوف
بورهان شێخ ڕه‌ئوف
بورهان شێخ ڕه‌ئوف
نەوزادی موهەندیس