بیروڕا
پارتی و خیانەت
د.به‌ختیارشاوه‌یس
فراکسیۆنی پارتی گەڕانەوە پایتەختی عیراق و بەداخەوە نەبونە جیرانێکی دۆست ! دواجار بۆیان دەرکەوت ئێمە خائین نین و نوێنەری ڕاستەقینەی خەڵکی کوردستانین لەبەغداد ئەگەر نا چەمکی خائین بون هەروا شتێکی سادە و بێ مۆڕاڵ نیە کە بەئارەزووی خۆت بیکەیەتە بەری بەرامبەرەکەت تەنها لەبەر ئەوەی کە بەگوێرەی مەرامی شەخسی و حیزبی تۆ ناجوڵێتەوە، بەڵام ئەوەی کەپێویستە هەموو لایەک لێی تێگەشتبن ئەوەیە کە پارتی دیموکراتی کوردستان تاکە مەبەستێک کە هەیبوە بۆ داتاشینی چەمکی خائین بەتایبەتی بۆ یەکێتییەکان تەنها ئەوە بوە کە لەهەندێک جوڵەی سیاسی و بڕیاری تاکرەوی و سەرکێشی شەخسی هەندێک لەسەرانی پارتی ، یەکێتیی ملی دانەداوە و ستۆپی بە پارتی کردوە و نەیهێشتوە لەوە زیاتر قومار بە ئایندەی هەرێمی کوردستانەوە بکات.
لەگەڵ هاتنەوەی پارتی بۆ ئەو بەغدایەی کەموفلیس بوە و پۆرەی نەماوە و هیچ خێری تیانیە بۆ کورد وەک چەند رۆژێک بەر لە ۲٥/۹ دەیانوت لەگەڵ گەرانەوەیان بۆ پەرلەمانی عیراق ئەنجومەنی پارێزگای کەرکوک مەترسی هەڵوەشانەوەی لەسەر دروستبوو ، کە هۆکاری راستەقینەی ئەمە بۆ هەوڵی ئەو پەرلەمانتارە تورکمان و عەرەبانە ناگەرێتەوە کە ۱٥۱ ئیمزایان کۆکردوەتەوە بەڵکو پەیوەندی بە کۆنەبونەوەی ئەندامانی پارتیە لەلیستی برایەتی و دانیشتنیانە لەهەولێر کە زیاتر لە مانگێکە دەستی دەستی دەکەن و هەر جارەی بەبیانویەک خۆیان دەدزنەوە لەکۆبونەوەو دیاریکردنی کوردێک بە پارێزگاری کەرکوک.
ئێستا حەق وایە پارتی خۆی یەکلابکاتەوە کەئایا ئەندامەکانی فراکسیۆنەکەی بەغدادیان خائینن ، یان ئەوانەیان لە لیستی برایەتی کەرکوک ؟ یان ئایا بەراست دڵەکەی کوردستانیان ئەوە ناهێنێت کە بەبێ مەرامی حیزبی بیریلێبکەیتەوە و بەناردنەوەی ئەندامەکانت هەم پارێزگار و هەم ئەنجومەنی پارێزگاکەی لەکەرکوک کە زۆرینەی کوردن لە هەرەشەو مەترسی لەدەستدان بپارێزیت و دەرچەیەک بکەیتەوە بۆ چارەسەرکردنی کێشەکانی ئەو شارە کە بەدانانی پارێزگارێکی کورد سەرەتاکەی دەردەکەوێت؟ یان ئەمەش موزایەدەیەی حیزبییە و وەک چەمکی خائین و خیانەتەکە خەڵکی سادەی پێ چەواشە دەکەن
پارتی کە لە خیانەتدا بەشی هیچ حیزبێکی کوردستانی نەهێشتوەتە دەیەوێت بەم قسە بێتامە دەریایەک لەهەڵەی سیاسی کوشندە کە هەموویان خیانەتن لە دەستکەوتەکانمان ، لە خوێنی شەهیدان و لە رەنجی دەیان ساڵەی تێکۆشەرانی ڕێگەی کوردایەتی گەرەکیەتی خۆی بدزێتەوە و پەردەپۆشیان بکات، ئەگەر نا خیانەت ئەوەیە کەگوێ لەبەدیلی ئەمریکی و داواکاری دۆستەکانمان لە ئەوروپا و ناوچەکە نەگریت. خیانەت ئەوەیە کە بڵێی تەحەمولی هەموو مەسئولەتێکی هەڵدەگرم و نەیکەیت، خیانەت ئەوەیە بڵێی هەر کەسێک لەگەڵ ریفراندۆم نەبێت لەشەمەندەفەرەکە جێدەمێنێت، خیانەت ئەوەیە بە ماکگۆرک بڵێی کاتم نیە لەگەڵ ئەو لوسکەیە دابنیشم و دواتر بپارێیتەوە بۆ دیدارێک . خیانەت ئەوەیە کە بڵێی پێشبینیمان نەدەکرد ئەمریکاو هاوپەیمانان پشتمان تێبکەن ، خیانەت ئەوە یە کە دوای شەڕێکی نابەرامبەری چوار سەعاتی و هەبوونی هەشتاو شەش شەهیدی یەکێتیی تۆمەت دروست بکەیت لەکاتێکدا کە خۆت بەبێ تەقە رۆژئاوای کەرکوک ، چاڵە نەوتەکانی هاڤانا و بای حەسەن ، دوبز ، شەنگار و مەخمور ، عەین زالە ، گوێر ، باشیک ، زومار ، تلکێف ، عانە ، سد موصل ، وانکی ، بەرتەلەت تەسلیم کردبێت.
کەواتە پارتی بۆ ئەوەی بتوانێت خەڵک فریو بدات باشترە واز لە چەمکی خیانەتی یەکێتیی بهێنێت چونکە ئەگەر بمانەوێت ڕیشەی خیانەتکاری هەڵدەینەوە ئەوا دەبێت لەئاشبەتاڵی هەفتاو پێنجەوە و پێشتریش دەستپێبکەین کە رەنگە ئەمەش نوسینی کتێبێکی بوێت.
‌‌ زیاتر ...
فه‌رید ئه‌سه‌سه‌رد
بورهان شێخ ڕه‌ئوف
سه‌ربه‌ست جیهاد
د.به‌ختیارشاوه‌یس
بورهان شێخ ڕه‌ئوف
بورهان شێخ ڕه‌ئوف
بورهان شێخ ڕه‌ئوف
نەوزادی موهەندیس