بیروڕا
ڕۆژهه‌ڵاتى ناوین له‌سه‌ر ئاگرێكى هێمن ده‌كوڵێت !
نەوزادی موهەندیس
گه‌ر به‌ دیقه‌ت له‌ مێژوو و ڕابووردووى ناوچه‌ى ڕۆژهه‌ڵاتى ناوین ووردبینه‌وه‌ ،هیچ ده‌یه‌ ساڵێك نابینیت كه‌ ئه‌م ناوچه‌یه‌ به‌ ئارامى گوزه‌رى كردبێت و پێشكه‌وتن و گه‌شه‌ى هه‌مه‌لایه‌نه‌ى ژیانى تیادا ڕوویدابێت،به‌ڵكو به‌ پێچه‌وانه‌وه‌ له‌ ئه‌زه‌له‌وه‌ ئه‌م ناوچه‌یه‌ گیرۆده‌ى نه‌فره‌تێكى نه‌بڕاوه‌ بوه‌ و ئه‌مه‌ بۆته‌ مایه‌ى شه‌ڕوشۆڕ و كاولكارى و دواكه‌وتن و بێئۆقره‌ییه‌كى هه‌میشه‌یى.
ئاشكراشه‌ هۆكارى ئه‌م ناكۆكى و ململانێ ئاینى و سیاسى و ئابورى و سه‌ربازیانه‌ ده‌گه‌ڕێته‌وه‌ له‌لایه‌ك بۆ دواكه‌وتوویى كۆمه‌ڵگاكانى ئه‌م ناوچه‌یه‌ به‌ گه‌ل و سه‌ركرده‌كانیانه‌وه‌ خۆیان و ته‌نها بۆ یه‌كلاكردنه‌وه‌ى ناكۆكیه‌كانیان په‌نایان بردۆته‌ به‌ر شه‌ڕ و خوێنڕشتن نه‌ك دایه‌لۆگ و لێكتێگه‌یشتن،هه‌رئه‌مه‌ش بۆته‌ كه‌لتورێكى قێزه‌ون و بێزراوى ناوچه‌كه‌ تا ئێستاش و له‌لایه‌كى تریشه‌وه‌ به‌هۆى ده‌وڵه‌مه‌ندى ناوچه‌كه‌ش به‌ سه‌رچاوه‌ى داهات و خۆشگوزه‌رانی و پێشكه‌وتن و داهێنانه‌كان هه‌میشه‌ بۆته‌ جێگه‌ى ته‌ماع و چاوتێبڕینى لایه‌نه‌كانى ده‌ره‌وه‌ و ئه‌وانیش هۆكارێك بوون بۆ نانه‌وه‌ى ئاژاوه‌  بۆئه‌وه‌ى بتوانن به‌ ئاشكرا و به‌ نهێنى و به‌ناوى پشتیوانى و هاوكارى گه‌لانى ناوچه‌كه‌ له‌ ژێر دروشمه‌ باقوبریقه‌كانى ئازادى گه‌لان و دیموكراسى و مافه‌كانى مرۆڤ و یه‌كسانیه‌وه‌ خۆیان بگه‌یه‌ننه‌ ناوچه‌كه‌ و بتوانن ده‌ستبگرن به‌سه‌ر ئه‌و سه‌رچاوه‌ گرنگانه‌ى وزه‌ و ئابورى و بتوانن بیخه‌نه‌ خزمه‌ت ماكینه‌ى پێشكه‌وتن و داهێنانه‌كانیانه‌وه‌ و دواتریش هه‌ر هه‌مان ناوچه‌كه‌ و كۆمه‌ڵگاكانیشیان بكه‌نه‌وه‌ بازاڕێكى به‌رده‌وام و به‌قازانج بۆ ده‌سكه‌وتنى سوودى گه‌وره‌تر بۆ خه‌زێنه‌ى حكومه‌ته‌كانیان.
جا ئه‌و ململانێیانه‌ به‌درێژایى 2000ساڵ به‌رده‌وامیان هه‌یه‌ و له‌ ئێستاشدا قۆناغێكى نوێى ئه‌و ململانێیانه‌ خه‌توخاڵیان ده‌ركه‌وتون به‌شێوه‌یه‌ك مه‌ترسیه‌كان هێند گه‌وره‌ن كه‌ لێكترازان و هه‌ڵوه‌شاندنه‌وه‌ و جه‌نگێكى خوێناوى سه‌رتاسه‌رى لێچاوه‌ڕوان ده‌كرێت،ئاشكراشه‌ هێنده‌ى ململانێكان ناوچه‌یى و ناوخۆیین،ده‌هێنده‌ كاره‌كته‌ر و فاكته‌رى ده‌ره‌كى ڕۆڵى تیادا ده‌بینن،ململانێكان هه‌مان ململانێ مێژوویه‌كانن و هۆكاره‌كانیش هه‌مان هۆكارن ،ته‌نها ئاڵوگۆڕ له‌ كاراكته‌ر و شێواز و میكانیزمه‌كانیاندا هاتوه‌ ئه‌وه‌ش به‌هۆى پێشكه‌وتنه‌ ته‌كنه‌لۆجى و سه‌ربازى و په‌ێوه‌ندیه‌كانه‌وه‌ن و هیچى تر.
له‌ ئێستادا ڕۆژهه‌ڵاتى ناوین بۆته‌ كوانوى ململانێیه‌كى توندى نێوان زلهێزه‌ ڕۆژئاوایى و ڕۆژهه‌ڵاتیه‌كان له‌نێوان ئه‌مریكا و ئه‌وروپاو ڕوسیاو تاڕاده‌یه‌كیش چین دا، له‌خوار ئه‌م دوو ناونیشانه‌ گه‌وره‌یه‌شه‌وه‌ ململانێكان به‌ ئیداره‌ و به‌ ئیڕاده‌ و پلانى ئه‌مان درێژه‌یان هه‌یه‌ و شۆڕبونه‌ته‌وه‌ بۆ نێوان كاراكته‌ره‌ ناوچه‌ییه‌كان و ئه‌مانیش له‌ناوخۆیاندا دابه‌شبونه‌ته‌ سه‌ر ئه‌و دوو بلۆكه‌ زلهێزانه‌ و ته‌نها بۆ پاراستنى به‌رژه‌وه‌ندیه‌كانى خۆیان و مانه‌وه‌یانه‌ بۆ زۆرترین ماوه‌ له‌ده‌سه‌ڵاتدا،ئه‌گینا ئه‌مان بڕیارده‌رى كۆتایى نین به‌ڵكو ته‌نها بوكه‌ڵه‌یه‌كن به‌ده‌ستوپه‌نجه‌ى زلهێزه‌كانه‌وه‌ هه‌ڵده‌سوڕێن، ململانێكانى ئێستا له‌ ناوچه‌كه‌دا له‌نێوان له‌لایه‌ك سعودیه‌ و وڵاتانى كه‌نداو جگه‌ له‌قه‌ته‌ر(( كه‌ له‌ئێستادا له‌ هێڵى كه‌نداویه‌كان ده‌رچوه‌ وتاڕاده‌یه‌ك په‌یوه‌ندیه‌كانى له‌گه‌ڵ ئێرانى دژیاندا توندوتۆڵكردۆته‌وه‌)) و میسر و ئوردون كه‌ به‌هۆى په‌یوه‌ندى ئاینى و مه‌زهه‌بیشه‌وه‌ توركیا هاوكار و پشتیوانیانه‌،به‌ڵام بۆخۆى توركیاش له‌دوولا مه‌ست و حه‌یران بوه‌ و به‌رژه‌وه‌ندیه‌كانى واده‌خوازن كه‌ ڕۆڵێكى تاسه‌ر دیاریكراوى نه‌بێت و زوو زوو ڕۆڵ و پێگه‌ى خۆى ده‌گۆڕێت،به‌ڵام سه‌ركه‌وتنى گه‌وره‌شى به‌ده‌ستنه‌هێناوه‌ جگه‌ له‌ پیشاندنى ڕسوایى و زه‌لیلى و دووڕوویى چونكه‌ ده‌وڵه‌تێكى  شه‌ڕه‌نگێز و پاوانخواز و هه‌نگاو به‌ره‌و تاكڕه‌وى كه‌سى ده‌نێت له‌سه‌رده‌مێكدا كه‌ قبوڵى تاكڕه‌ى ناكات.ئه‌م به‌ره‌یش وه‌كو خووى كلاسیكى و كۆنه‌پارێزى خۆیان هه‌میشه‌ له‌ خولگه‌ى زلهێزه‌كانى ئه‌مریكا و ئه‌وروپیه‌كاندا ده‌سوڕێنه‌وه‌ و هه‌میشه‌ به‌ پشتیوانى خۆیانیان ده‌زانن.به‌ره‌ى دووه‌م و دژ به‌م به‌ره‌یه‌ له‌ناوچه‌كه‌دا به‌ ڕابه‌رایه‌تى ئێرانه‌ و هه‌ریه‌كه‌ش له‌ ڕژێمه‌كانى عێراق و سوریا و لوبنان و یه‌مه‌ن و ته‌نانه‌ت هێزه‌ ڕزگاریخوازه‌كانى فه‌له‌ستینیشى كردۆته‌ پاوانى خۆی و وایكردوه‌ له‌خولگه‌ى سیاسه‌ت و تێڕوانین و به‌رژه‌وه‌ندى سیاسى و ئاینى و مه‌زهه‌بیه‌كانى شیعه‌دا بخولێنه‌وه‌و تاڕاده‌یه‌كیش سه‌ركه‌وتوو بوه‌ ،ئه‌م به‌ره‌یه‌ به‌ سروشت و هه‌ڵكه‌وته‌ى پێگه‌ جیۆسیاسیه‌كه‌ى هه‌میشه‌ لایه‌نگرى ڕۆژهه‌ڵات و زلهێزه‌كانى بوه‌ له‌ ڕوسیا و چین و كۆریاى باكور كه‌ سروستى ڕژێم و سیستمى حوكمڕانیه‌كانیشیان ئاینى و تاكڕه‌وى و خۆسه‌پێن و دوور له‌دیموكراسیه‌ت و ئازادیه‌كان بوون.
له‌م نێوه‌ده‌شدا و له‌نێوان ئه‌م كاراكته‌ره‌ ناوچه‌ییانه‌شدا ململانێیه‌كى ناوچه‌یى توند هه‌یه‌ له‌سه‌ر ڕابه‌رایه‌تیكردنى ناوچه‌كه‌ له‌ نێوان هه‌ریه‌كه‌ له‌ توركیا و ئێران و سعودیه‌ و میسر و ئیسڕائیلدا.كه‌ ڕه‌گ و ڕیشه‌ى مێژوویى و ئاینى و مه‌زهه‌بیان له‌خۆگرتوه‌.
له‌ ئێستادا ململانێكان زۆر توندبون و نزیك كه‌وتونه‌ته‌وه‌ له‌به‌ریه‌ك كه‌وتنى ڕاسته‌وخۆ و هه‌ڵایسانى شه‌ڕى گه‌رم كه‌ بنچینه‌ى ڕاسته‌قینه‌یان بریتیه‌ له‌ ململانێى ئاینى و مه‌زهه‌بى نێوان سونه‌ و شیعه‌ى ئیسلامیدا، چونكه‌ ئه‌م وڵاتانه‌ به‌تایبه‌تى سعودى و كه‌نداویه‌كان و ئێران وڵاتانێكى ده‌وڵه‌مه‌ندن و هیچیان پێویستیان به‌سه‌رچاوه‌كانى سروشتى و وزه‌ى ئه‌وى تر نیه‌ و ململانێكه‌ له‌نێوان هه‌ژار و ده‌وڵه‌مه‌ندا نیه‌ وه‌ك ئه‌وه‌ى له‌ نێوان بكور و باشورى گۆى زه‌ویدا هه‌یه‌،ته‌نها بۆ فراوانكردنى نفوز و پێگه‌ و هێزى سه‌ربازى و مه‌زهبیه‌ له‌ ناوچه‌كه‌دا،له‌م نێوه‌نده‌شدا زلهێزه‌كان ته‌نها ڕۆڵى ئیداره‌دان و درێژه‌پێدانی ئه‌و ململانێیانه‌یان هه‌یه‌ بۆئه‌وه‌ى باشترین و گه‌وره‌ترین و به‌رده‌وامترین بازاڕ بۆ چه‌ك و ته‌قه‌مه‌نى و پێداویستیه‌ سه‌ربازیه‌كانیان بدۆزنه‌وه‌،ئه‌وه‌تا له‌ هیچ سه‌ردانێكى سه‌رانى زلهێزه‌كان بۆ ناوچه‌كه‌ به‌ده‌ستى به‌تاڵ ناگه‌ڕێنه‌وه‌ و ئه‌مریكا به‌ته‌نها گریێبه‌ستى زیاد له‌ 500 ملیار دۆرلا له‌گه‌ڵ سعودیه‌ و ئه‌وانى تردا گرێداوه‌ و ڕوسیاش ته‌نها له‌ 9 مانگى ساڵى 2017دا بایى 15 ملیار دۆلار چه‌ك و ته‌قه‌مه‌نى فرۆشتوه‌.بۆیه‌ هه‌رگیز ئه‌و زلهێزانه‌ به‌جدى نیه‌تى چاره‌سه‌ركردنى كێشه‌كانى ئه‌م ناوچه‌یه‌ به‌تایبه‌تى و دونیاش به‌گشتى نیه‌ و به‌ڵكو هه‌میشه‌ بۆ دۆزینه‌وه‌ و دروستكردن و سه‌رهه‌ڵدانى كێشه‌ و قه‌یران و ئاڵۆزى نوێ له‌ پیلانداناندان بۆئه‌وه‌ى مان و قازانجى خۆیان به‌رده‌وامى پێبده‌ن.
له‌ ئێستادا ئه‌م ناوچه‌یه‌ له‌سه‌ر ئاگرێكى ئارام و هێمن ده‌كوڵێت و قوڵپ ده‌دات و زۆر نزیكه‌ به‌ریه‌ككه‌وتنى گه‌رم ڕووبدات و وه‌ك ئه‌و شیره‌ هه‌ڵچوه‌ى لێبێت كه‌ ده‌بێته‌ مایه‌ى كاولكارى و لێكهه‌ڵوه‌شانى وڵاتان و سنوره‌كانى ناوچه‌كه‌ و دووباره‌ و سه‌رله‌نوێ به‌ شقڵ و شێوه‌یه‌كى نوێوه‌ له‌لایه‌ن زلهێزه‌كان دابه‌ش و داگیر بكرێنه‌وه‌ و دروست بكرێنه‌وه‌ وه‌ك ئه‌وه‌ى له‌چوارچێوه‌ى بیردۆزه‌ى فه‌وزاى دروستكه‌ردا له‌پێش 30 ساڵ له‌ئێستاوه‌ به‌رنامه‌ و پلانیان بۆ داڕشتوه‌.
پرسیارگه‌لێك كه‌ جێگه‌ى خۆیه‌تى بكرێت،ئه‌وه‌یه‌ كه‌ ئه‌مه‌ حاڵى وڵاتانى خاوه‌ن سه‌روه‌رى و سیادى ناوچه‌كه‌ بێت به‌ده‌ست زلهێزه‌كانه‌وه‌؟ئه‌ى حاڵ و دۆخى كورد و كوردستانى داگیر و دابه‌شكراو و بێ ده‌وڵه‌ت و سه‌روه‌رى و سنور ده‌بێت چۆن بێت؟ كورد له‌كوێى ئه‌م گه‌مه‌ و ململانێیانه‌دایه‌؟ ده‌توانێت چى بكات؟ چۆن قازانج و ده‌سكه‌ت به‌ده‌ستبێنێت؟
به‌داخه‌وه‌ كورد هه‌میشه‌ و به‌درێژایى مێژووى خه‌باتى خۆى له‌م ناوچه‌یه‌دا هه‌ر زوڵملێكراو و پشتگوێخراو و خاك و گه‌له‌كه‌شى داگیر و دابه‌شكراو بون و تائێستاش نه‌بونه‌ته‌ خاوه‌نى ده‌وڵه‌تێكى نه‌ته‌وه‌یى و نیشتیمانى خۆیان،دۆخى سیاسى و ئابورى و سه‌ربازى كورد هه‌میشه‌ خراپ بوه‌،زلهێزه‌كان هێنده‌ى وه‌ك شه‌ڕكه‌رێكى ئازا سه‌یریان كردوه‌ و پشتیوانى و هاوكاریان كردوه‌،نیوهێنده‌ وه‌ك نه‌ته‌وه‌یه‌كى زوڵملێكرا و خاوه‌ن مافى ڕه‌وا نه‌یانبینیوه‌ و ته‌نها بۆ مه‌به‌ست و به‌پێى نه‌خشه‌ و پلانه‌كانى خۆیان ڕۆڵیان پێداوه‌ و هه‌ركاتیش له‌ پلان و گوته‌ و فه‌رمانى ئه‌وان ده‌رچووبێت كردویانه‌ته‌ قۆچى قوربانى و په‌ندى زه‌مانه‌ ،هه‌روه‌ك له‌ سه‌رده‌مى مه‌لیك مه‌حمود و كۆمارى كوردستان وشۆڕشى ئه‌یلول و شۆڕى نوێ و ئه‌م قۆناغه‌ى ئێستاش له‌ بوونى هه‌رێمێكى نیمچه‌ سه‌ربه‌خۆ له‌ عێراقدا ، ته‌نها له‌سه‌ر به‌قسه‌نه‌كردن و ده‌رچوون له‌هێڵى قازانجى ئه‌وان له‌كه‌متر له‌ 24 كاتژمێردا 51% خاكى كوردستانیان پێشكه‌ش به‌ به‌غدادى پایته‌ختى عه‌ره‌بى شیعه‌ مه‌زهه‌ب كردوه‌ به‌بێگوێدانه‌ ئه‌و هه‌موو قوربانى و خوێن و فرمێسك ڕشتنه‌ى كورد كه‌ پێشكه‌ش به‌ مرۆڤایه‌تى و هه‌موو دونیاى كرد له‌و چه‌ند ساڵه‌ى ڕابووردوودا.كه‌ هه‌رچه‌ند له‌گه‌ڵ ئێراندا له‌سه‌ر عێراق و ئاینده‌ و سامانه‌ سروشتیه‌كانى له‌ململانێیه‌كى توندان و هیچ كات ناگه‌ن به‌یه‌كتر،به‌ڵام كوردیان كرده‌ دیاریه‌كى هه‌رزان به‌هاى خۆیان بۆ به‌غداد  بۆئه‌وه‌ى ئاینده‌ى ئابورى خۆیان مسۆگه‌رتر بكه‌ن.
كورد به‌داخه‌وه‌ تائێستاش خاڵى لاوازه‌ و پنتى گرنگ نیه‌ له‌ سیاسه‌ت و پلانى زلهێزه‌كانداـ سه‌ره‌ڕاى قوربانیدان و مقاوه‌مه‌تى چه‌ندین ساڵه‌ى دژ به‌ دڕنده‌ترین ڕێكخراوى تیرۆریستى له‌جیهاندا((داعش)).
كورد له‌ئێستادا و له‌دواى بچوكبنه‌وه‌ى قه‌واره‌ و ده‌سه‌ڵاتى له‌ عێراقداو به‌هۆى هه‌ڵًكه‌وته‌ى له‌ناوجه‌رگه‌ى ڕووداوه‌كان و گۆڕانكاریه‌كاندا به‌جدى ڕووبه‌ڕووى گه‌لێك ئاڵنگارى گه‌وره‌ ده‌بێته‌وه‌ كه‌ زۆر دووره‌ بتوانێت به‌رگرى له‌ م قه‌واره‌یه‌ى خۆى بكات، چونكه‌ كه‌وتۆته‌ ناوجه‌رگه‌ى ململانێكان و سه‌ره‌ ڕێگاى ململانێكانى نێوان ڕوسیا و ئه‌مریكا له‌لایه‌ك و له‌لایه‌كى تریشه‌وه‌ له‌نێوان ئێران و توركیادا و له‌ولاى تریشه‌وه‌ له‌نێوان سونه‌ مه‌زهه‌ب و شیعه‌ مه‌زهه‌به‌كانى سعودیه‌ و ئێران و توركیادا،كه‌ هیچیان قازانجى كوردیان گه‌ره‌ك نیه‌،به‌ڵكو هه‌ریه‌كه‌یان گه‌ره‌كێتى په‌لكێشى پیلانه‌كانى خۆیانى بكه‌ن و بۆماوه‌یه‌ك سوود له‌توانا و ئازایه‌تى وه‌ربگرن.
بۆیه‌ كورد هه‌قه‌ چیدى به‌ به‌ڵێن و گوته‌ى بریقه‌دار و پیاهه‌ڵدانى نه‌زلهێزه‌كان و نه‌ كاراكته‌ره‌ ناوچه‌یه‌كانیش هه‌ڵنه‌خڵه‌تێ، به‌ڵكو ته‌نها سیاسه‌تێكى كوردانه‌ى نیشتیمانى و نه‌ته‌وایه‌تى چێ بكات، كێیان سوود و قازانجى زیاترى بۆ كورد پێبوو له‌گه‌ڵیدا بێت بۆ تاكتیك نه‌ك تاسه‌ر،خۆنه‌به‌ستنه‌وه‌ به‌ كۆنكرێتى له‌گه‌ڵ هیچ لایه‌كدا و تێكه‌ڵ نه‌بوونى قوڵ له‌گه‌ڵ هیچ به‌رژه‌وه‌ندیه‌كدا و ڕاوه‌ستانه‌ له‌ پێگه‌یه‌كى وه‌ك یه‌ك له‌گه‌ڵ هه‌مواندا، كورد ناتوانێت به‌رگرى تاسه‌ر له‌خۆى بكات له‌به‌رامبه‌ر هیچ كام له‌و هێزانه‌دا هه‌ربۆیه‌ پێویستى به‌پشتیوانیه‌كى به‌رده‌وام هه‌یه‌ كه‌ به‌پێى به‌رژه‌وه‌ندى خۆى بیانگۆڕێت، له‌ وڵاتانى زلهێز و ناوچه‌كه‌ش و هه‌موو هێلكه‌كانى نه‌خاته‌ یه‌ك سه‌به‌ته‌ى دیاریكراوه‌وه‌، كورد ناتوانێت هه‌ڕه‌شه‌ له‌هیچ كامیان بكات و توندبێت له‌گه‌ڵیاندا هه‌ربۆیه‌ ده‌بێت ته‌نها ڕێگاى گفتوگۆو لێكتێگه‌یشتن و پاراستنى به‌رژه‌وه‌ندیه‌كانى و دۆستایه‌تى هه‌ڵببژێرێت .
كورد ته‌نها به‌یه‌ك و یه‌كگرتوویى هێز و توانا و ڕێكخستنى نێو ماڵى خۆى و چه‌سپاندنى یه‌كێتى و متمانه‌ له‌نێو ماڵى خۆیدا ده‌توانێت ڕووبه‌ڕووى ئه‌م ئاڵنگاریانه‌ ببێته‌وه‌ و له‌كاتى ڕوودانى به‌ریه‌ك كه‌وتنى گه‌رم له‌نێوان ئه‌م جه‌مسه‌ر و زلهێزه‌ دونیایى و ناوچه‌ییانه‌دا بتوانێت تابۆى بكرێت خۆى له‌شه‌ڕ و ئاگریان بپارێزێت، تا  موعجیزه‌یه‌ك ڕووده‌دات له‌ هاوكێشه‌ و به‌ڵانسى هێزه‌كاندا و ده‌توانێت به‌قازانجى خۆى ئه‌م شكستانه‌ى بۆ سه‌ركه‌تن و ده‌سكه‌وتى زیاتر بگۆڕێته‌وه‌.
كورد به‌ناچارى و به‌بێ ویستى خۆى كه‌وتۆته‌ ناو ئه‌و مه‌نجه‌ڵه‌ى كه‌ پێى ده‌وترێت ڕۆژهه‌ڵاتى ناوین و له‌ئێستاشدا له‌سه‌ر ئاگرێكى هێمن ده‌كوڵێت و هه‌ركات گه‌یشه‌ ئاستى هه‌ڵچون و ته‌قینه‌وه‌ گه‌ره‌كه‌ كورد زیره‌ك و لێزانانه‌ فریاى خۆى بكه‌وێت،چونكه‌ ده‌ركه‌وت كه‌ كورد دۆستى ڕاسته‌قینه‌ى نیه‌ و هه‌موان ناحه‌ز ودژین،جا ئه‌مه‌ش له‌لایه‌ك بۆ بێبه‌ڵێنى ناحه‌زه‌كان ده‌گه‌ڕێته‌وه‌و له‌لایه‌كیش بۆ گه‌مژه‌یى و نه‌فامى كورد و هه‌ڵه‌ خوێندنه‌وه‌ى هاوكێشه‌ و هێزه‌كان ده‌گه‌ڕێته‌وه‌ له‌هه‌ڵبژاردنى دۆسته‌كان و لایه‌نه‌ سه‌ركه‌وتوو به‌هێزه‌كانى گه‌مه‌ى ناوچه‌كه‌دا.به‌ڵام ئیدى كاتى ئه‌وه‌ هاتوه‌ كه‌ كوردیش په‌ندو عیبره‌ت له‌ ڕابووردووى خۆى وه‌ربگرێت و چانس و كارته‌كانى خۆى وه‌ك مه‌سه‌له‌ و نه‌ته‌وه‌ و نیشتیمان به‌فیڕۆ نه‌دات و ئاینده‌شى نه‌كاته‌ قوربانى خواست و ویستى ناڕه‌واى سه‌ركرده‌ و كه‌س و پارته‌ سیاسیه‌كانى.
‌‌ زیاتر ...
فه‌رید ئه‌سه‌سه‌رد
بورهان شێخ ڕه‌ئوف
سه‌ربه‌ست جیهاد
د.به‌ختیارشاوه‌یس
بورهان شێخ ڕه‌ئوف
بورهان شێخ ڕه‌ئوف
بورهان شێخ ڕه‌ئوف
نەوزادی موهەندیس